काबुल। अफगानिस्तान र पाकिस्तानबीच चर्किएको सैन्य तनावका बीच शनिबार जलालाबाद सहरमा एक पाकिस्तानी लडाकू जेट खसालिएको र त्यसका पाइलटलाई जीवित अवस्थामा नियन्त्रणमा लिइएको अफगान सुरक्षा निकायहरूले जनाएका छन् । यो घटनाले दुई देशबीचको द्वन्द्व थप तीव्र भएको सङ्केत गरेको छ ।
अफगान प्रहरी प्रवक्ता तैयब हम्मादका अनुसार जलालाबाद सहरको प्रशासनिक क्षेत्र नम्बर ६ मा उडिरहेको पाकिस्तानी लडाकू जेटलाई गोली हानी खसालिएको थियो । “जेट खसालिएपछि पाइलटलाई जिउँदै समातिएको छ,” उनले भने । पूर्वी अफगानिस्तानस्थित सेनाका प्रवक्ता वाहिदुल्लाह मोहम्मदीले पनि अफगान सेनाले जेट खसालेको र पाइलटलाई नियन्त्रणमा लिएको पुष्टि गरेका छन् ।
एएफपीका एक पत्रकारले घटनास्थल नजिकै जेटको तीव्र आवाज सुनिएको र त्यसपछि विमानस्थलतर्फबाट दुईवटा शक्तिशाली विस्फोटका आवाज आएको बताएका छन् । घटनास्थल वरपर सुरक्षा व्यवस्था कडा पारिएको छ ।
पाकिस्तानको सेना तथा सूचना मन्त्रालयले यस विषयमा तत्काल कुनै प्रतिक्रिया दिएका छैनन् । पछिल्लो समय सीमा क्षेत्रमा बढ्दो झडप तथा हवाई कारबाहीले दुवै देशबीचको सम्बन्ध निकै तनावपूर्ण बनेको छ ।
यसअघि पाकिस्तानले शुक्रबार अफगानिस्तानको राजधानी काबुल तथा दक्षिणी सहर कान्दाहारमा हवाई आक्रमण गरेको थियो । कान्दाहारलाई तालिबान सर्वोच्च नेता हिबतुल्ला अखुन्दजादाको मुख्य आधार क्षेत्र मानिन्छ । अफगान पक्षका अनुसार बिहीबार राति अफगान सेनाले पाकिस्तानविरुद्ध सीमा क्षेत्रमा कारबाही सुरु गरेपछि हवाई आक्रमण भएको हो । तालिबान सरकारले यसलाई पाकिस्तानी आक्रमणको प्रतिउत्तर भएको बताएको छ ।
यसैबीच पाकिस्तानले अफगानिस्तानभित्र एक दिन लामो तोपखाना तथा हवाई कारबाहीमा ३३१ भन्दा बढी अफगान तालिबान लडाकु मारिएको र ५०० भन्दा बढी घाइते भएको दाबी गरेको छ । सूचनामन्त्री अत्ताउल्लाह तारारका अनुसार १०२ अफगान चौकी ध्वस्त पारिएको, २२ कब्जा गरेको तथा ३७ स्थानमा १६३ ट्याङ्क र बख्तरबन्द सवारी नष्ट गरेको जनाइएको छ ।
अफगानिस्तानको रक्षा मन्त्रालयले भने मिरानशाह र स्पिन वाम क्षेत्रमा पाकिस्तानी सैन्य आधारहरूमा रातभर आक्रमण गरी भारी क्षति पुर्याएको जनाएको छ । अफगान प्रवक्ता जबिहुल्लाह मुजाहिदले ५५ पाकिस्तानी सैनिक मारिएको दाबी गर्दै पाकिस्तानको ‘हरेक कदमको जवाफ दिइने’ चेतावनी दिएका छन् ।
पूर्वी अफगानिस्तानका अधिकारीहरूले पाकिस्तानी आक्रमणमा कम्तीमा ११ सर्वसाधारण मारिएको आरोप लगाएका छन् । पाकिस्तानले भने केवल सैन्य लक्ष्यमा प्रहार गरिएको र नागरिक हताहतबाट जोगिन प्रयास गरिएको दाबी गरेको छ ।
तनावका कारण तोरखाम सीमा क्षेत्रमा सयौँ परिवार विस्थापित भएका छन् । केही अफगान शरणार्थीहरू सीमा पार गर्न नसकी अलपत्र परेका छन् । रमजान महिनामा खाद्यान्न अभाव झेलिरहेका स्थानीयहरूले युद्धविरामको माग गरेका छन् ।
अक्टोबरयता जारी झडपमा दर्जनौँ सैनिक तथा नागरिक मारिएका छन् । कतारको मध्यस्थतामा भएको युद्धविराम स्थायी हुन सकेन । हाल टर्की, साउदी अरेबिया, कतार र चीनले फेरि मध्यस्थताको प्रयास गरिरहेका छन् । कतारका राज्यमन्त्री मोहम्मद बिन अब्दुलाजिज अल–खुलाइफीले दुवै देशका विदेशमन्त्रीसँग तनाव कम गर्ने विषयमा वार्ता गरेको बताइएको छ ।
यो घटनाले क्षेत्रीय सुरक्षामा थप अनिश्चितता थपेको छ र दुवै पक्षबीचको सैन्य गतिविधि अझ बढ्न सक्ने सङ्केत गरेको छ ।
प्रकाशित मिति: १६ फाल्गुन २०८२, शनिबार
प्रतिक्रिया