गोरखा। गोरखाका दुवै प्रतिनिधिसभा निर्वाचन क्षेत्रमा पूर्वप्रधानमन्त्री डा. बाबुराम भट्टराई नेतृत्वको प्रगतिशील लोकतान्त्रिक पार्टी (प्रलोपा) ले नेपाली कांग्रेसका उम्मेदवारलाई सहयोग गर्ने निर्णय गरेको छ ।
प्रलोपाले फागुन २१ गते हुने निर्वाचनमा प्रत्यक्षतर्फ कांग्रेसको चुनाव चिन्ह ‘रुख’ लाई समर्थन गर्ने भएको हो । समानुपातिकतर्फ भने प्रलोपाले आफ्नै चुनाव चिन्ह ‘आँखा’ मा मत माग्ने निर्णय गरेको छ ।
प्रलोपाका गोरखा जिल्ला अध्यक्ष नारायण खत्रीले दुई पार्टीबीच भएको समझदारीअनुसार प्रत्यक्षतर्फ कांग्रेसलाई पूर्ण सहयोग गर्ने निर्णय भएको बताए । प्रलोपाको हालै सम्पन्न बैठकले गोरखाका दुवै क्षेत्रमा कांग्रेसलाई सहयोग गर्ने निर्णय गरेको उनले जानकारी दिए ।
प्रलोपाले गोरखाका दुवै निर्वाचन क्षेत्रमा आफ्ना उम्मेदवारहरू खडा गरे पनि ती उम्मेदवारी फिर्ता लिएको छ । कांग्रेसले यो निर्णयको स्वागत गर्दै प्रलोपाप्रति आभार प्रकट गरेको छ ।
यसअघि विसं २०७४ को निर्वाचनमा डा. भट्टराईले कांग्रेससँग तालमेल गरी गोरखा क्षेत्र नं २ बाट प्रतिनिधिसभा सदस्यमा निर्वाचित भएका थिए । अहिलेको निर्णयले गोरखामा कांग्रेसको स्थिति थप मजबुत हुने देखिएको छ ।
फागुन २१ गते हुने निर्वाचन नजिकिँदै गर्दा विभिन्न दल तथा समूहबीच हुने सहकार्य तथा तालमेलले चुनावी समीकरण दिनप्रतिदिन रोचक बन्दै गएको छ ।
प्रकाशित मिति: १६ फाल्गुन २०८२, शनिबार
प्रतिक्रिया