काठमाडौं। वीरगञ्जमा धार्मिक सद्भाव बिगार्ने उद्देश्यले सुँगुरको टाउको मस्जिदमा फाल्ने योजना बनाएका ३ जनालाई नेपाली सेनाले पक्राउ गरेको छ । गएराति करिब २ बजे श्रीजंग गण वीरगञ्जको नेतृत्वमा वीरगञ्ज महानगरपालिका–१६ इनर्वा क्षेत्रमा सञ्चालन गरिएको विशेष सर्च अपरेसनका क्रममा उनीहरूलाई नियन्त्रणमा लिइएको हो ।
पक्राउ पर्नेहरूमा वीरगञ्ज १६ निवासी कृष्ण यादव, सोही ठाउँका रोहित पटेल र अवजित यादव रहेका छन् । उनीहरूको साथबाट सुँगुरको टाउको, ९ थान सुतली बम, सेतो रंगको तार ५ वटा बरामद गरिएको छ ।
प्रारम्भिक अनुसन्धानमा उनीहरूले रमजानको पवित्र महिना चलिरहेका बेला सुँगुरको टाउको मस्जिदमा फाल्ने योजना बनाएको खुलेको छ । इस्लाममा सुँगुरलाई हराम मानिन्छ । यदि यो योजना सफल भएको भए धार्मिक द्वन्द्व तथा हिंसा फैलिने जोखिम निकै उच्च थियो ।
नेपाली सेनाको टोलीले समयमै सूचना पाएपछि विशेष अपरेसन चलाएर उनीहरूलाई पक्राउ गरेको हो । पक्राउ परेका व्यक्तिहरूमाथि थप अनुसन्धान भइरहेको छ । उनीहरूलाई प्रहरी हिरासतमा राखेर धार्मिक सद्भाव बिगार्ने तथा आपराधिक कसुरमा कारबाही अघि बढाइने बताइएको छ ।
यो घटनाले वीरगञ्ज जस्तो धार्मिक सद्भावको नमुना मानिने क्षेत्रमा पनि यस्ता योजनाहरू हुन सक्ने संकेत गरेको छ । निर्वाचन नजिकिँदै गर्दा यस्ता घटनाले सुरक्षा चुनौती थपेको छ । स्थानीय प्रशासन तथा सुरक्षा निकायहरूले उच्च सतर्कता अपनाएका छन् ।
प्रकाशित मिति: २० फाल्गुन २०८२, बुधबार
प्रतिक्रिया