चुनाव जितेका महावीरले फेरी किताब बेच्न सुरु गरे

काठमाडौं। प्रतिनिधिसभा सदस्य निर्वाचनमा निर्वाचित भएका राष्ट्रिय आविष्कार केन्द्रका संस्थापक महावीर पुनले फेरि आफ्नो आत्मकथाको किताब बेच्न सुरु गर्ने भएका छन् ।

सोमबार सामाजिक सञ्जालमा पोस्ट गर्दै उनले पोखराको अमरसिंह चोकमा बिहान १० बजेदेखि किताब बेच्न सुरु गर्ने जानकारी दिएका हुन् । त्यसपछि पृथ्वीचोकमा दिउँसो १ बजेदेखि र महेन्द्रपुलमा अपराह्न ४ बजेदेखि किताब बिक्री गर्ने उनले बताएका छन् ।

महावीरले लेखेका छन्, “चुनाव पनि लड्ने र किताब पनि बेच्ने भनेर किताबहरू लगेको थिएँ, तर निर्वाचन आयोगले चुनावमा बेच्न दिएन । बीरगञ्जमा कृषि औजार कारखाना मज्जाले चलिरहेकै छ, त्यसैले पैसा त चाहियो नि ।”

उनले निर्वाचन अवधिमा किताब बिक्री गर्न नपाएको गुनासो गरेका छन् । अहिले निर्वाचन सम्पन्न भएसँगै उनले फेरि किताब बेच्ने क्रम सुरु गरेका हुन् । महावीर पुनले आफ्नो आत्मकथा ‘महावीर पुन : एक आविष्कारकको कथा’ बेच्दै आएका छन् ।

यो कदमले उनको व्यावहारिक तथा आर्थिक पक्षलाई पनि उजागर गरेको छ । बीरगञ्जमा सञ्चालित कृषि औजार कारखानाको सञ्चालन खर्च व्यवस्थापनका लागि किताब बिक्रीलाई निरन्तरता दिने उनको योजना रहेको देखिन्छ ।

प्रकाशित मिति: २५ फाल्गुन २०८२, सोमबार