काठमाडौं । नेकपा एमाले का उपमहासचिव योगेश भट्टराईले प्रतिनिधि सभा निर्वाचनमा प्राप्त मतमार्फत् जनताले पार्टीको नीति र नेतृत्वलाई शान्तिपूर्ण रूपमा अस्वीकृत गरेको बताएका छन्।
सोमबार सामाजिक सञ्जाल फेसबुकमा स्ट्याटस प्रकाशित गर्दै भट्टराईले भने, ‘निर्वाचनले देखाएको वास्तविकता स्वीकार गर्नुपर्छ। अब हाम्रो पार्टीले सर्वांगीण रूपान्तरणमार्फत् जनसमर्थन पुनः आर्जन गर्नुपर्ने अवस्था आएको छ। भाद्र २३ र २४ पछि पार्टीले लिएका नीति ठिक थिएनन्, त्यसमा सुधारको repeatedly अनुरोध गरेका थियौं, तर सफल भएनौं। अब खुला बहस र गम्भीर छलफल आवश्यक छ।’
भट्टराईले पार्टीको हालको असफलतामा नीतिगत निर्णय मात्रै नभई जिम्मेवारीमा रहेका सबै तहगत कमिटी र नेताहरूको सहभागिता रहेको उल्लेख गरे। ‘केन्द्रीय कमिटी र सचिवालयले नै अपजसको मुख्य भार बोक्नुपर्छ। सफलता वा असफलताको जवाफदेहीता अन्ततः प्रमुख नेतामा केन्द्रित रहन्छ,’ उनले थपे।
उपमहासचिवले पार्टीभित्र पूर्वाग्रह, भावना र षड्यन्त्रको दृष्टिकोण भन्दा माथि उठेर निष्पक्ष छलफल गर्नुपर्नेमा जोड दिएका छन्। ‘सामूहिक बुद्धि, विवेक र पहलबाट मात्र वर्तमान अवस्था परिवर्तन गर्न सकिन्छ। हिजोका गुटगत सीमाबाट बाहिर निस्केर खुला बहसमा सहभागी हुन सबै कमरेडलाई आह्वान गर्दछु,’ उनले भने।
भट्टराईले पार्टी कार्यकर्तालाई सम्बोधन गर्दै स्पष्ट पारे, ‘हामी ढलेका मात्र हौँ, मरेका होइनौँ। सही नीति, सही सङ्गठन, सही नेतृत्व, सही व्यवहार र कार्यशैलीबाट एमाले फेरि उठ्नेछ र पार्टी, जनता तथा राष्ट्रको स्वाभिमान पुनः स्थापित हुनेछ।’
उनी संयम र धैर्यका साथ पार्टी एकता जोगाउन, सही मार्गमा अघि बढ्न र आत्मभर्त्सना होइन, आत्मसमीक्षाको बाटो अपनाउन सबै कमरेडलाई आग्रह पनि गरेका छन्। साथै बुद्धिजीवी र आम जनसमुदायलाई पनि पार्टी सुधारका लागि सुझाव, आलोचना र टिप्पणी पठाउन अपिल गरेका छन्।
भट्टराईले राष्ट्रिय एकता, नेपाली सार्वभौमिकता र वाम–लोकतान्त्रिक विचारधाराको रक्षा वर्तमान साझा राष्ट्रिय जिम्मेवारी भएको उल्लेख गर्दै, ‘जनादेशको सम्मान र राजनीतिक विचार तथा शक्तिबीच सकारात्मक सहकार्यको लागि सबैमा अपिल गर्दछु,’ भनेका छन्।
प्रकाशित मिति: २५ फाल्गुन २०८२, सोमबार
प्रतिक्रिया