काठमाडौं । महावीर पुन, राष्ट्रिय आविष्कार केन्द्रका संस्थापक तथा प्रतिनिधि सभा सदस्य, फेरि एकपटक वीरगन्जस्थित कृषि औजार कारखानामा पुगेका छन्। लामो समयदेखि बन्द अवस्थामा रहेको उक्त कारखानालाई पुनः सञ्चालन र आधुनिकीकरण गर्ने सम्भावनाबारे अध्ययन गर्न उनी त्यहाँ पुगेका हुन्।
कारखाना परिसरको अवलोकन गर्दै पुनले त्यहाँ रहेका मेसिन, भौतिक संरचना र जनशक्तिको अवस्थाबारे जानकारी लिए। साथै, उनले स्थानीय सरोकारवालासँग छलफल गर्दै स्वदेशमै कृषि औजार उत्पादन बढाउनुपर्नेमा जोड दिए। उनका अनुसार नेपालमा प्रयोग हुने अधिकांश कृषि उपकरण आयातमा निर्भर भएकाले यसलाई घटाउन स्वदेशी उत्पादन प्रवर्द्धन अपरिहार्य छ।
कुनै समय देशकै प्रमुख कृषि औजार उत्पादन केन्द्रका रूपमा परिचित यो कारखाना पछिल्लो केही वर्षदेखि निष्क्रिय अवस्थामा छ। पुनको सक्रियतासँगै यसको पुनर्जीवनबारे पुनः आशा जगिएको छ। स्थानीय उद्योगी, कृषक तथा सरोकारवालाले पनि कारखाना सञ्चालनमा आए कृषिको लागत घट्ने र रोजगारीका अवसर सिर्जना हुने विश्वास व्यक्त गरेका छन्।
पुनले सरकार, निजी क्षेत्र र प्राविधिक समूहबीच सहकार्य भए कारखानालाई आधुनिक बनाउँदै पुनः सञ्चालनमा ल्याउन सकिने बताए। यसका लागि निकट भविष्यमा विस्तृत योजना सार्वजनिक गरिने जनाइएको छ।
प्रकाशित मिति: ९ चैत्र २०८२, सोमबार
प्रतिक्रिया