काठमाडौं। इरानविरुद्ध अमेरिका र इजरायलले थालेको युद्धमा यमनका हुथी विद्रोही समूह पनि प्रत्यक्ष रूपमा मिसिएको छ । हुथीले इजरायललाई लक्षित गर्दै ब्यालिस्टिक क्षेप्यास्त्र प्रहार गरेका छन् ।
सीएनएनको रिपोर्ट अनुसार युद्ध दोस्रो महिनामा प्रवेश गरिरहँदा हुथी विद्रोही समूहले इजरायलमाथि मिसाइल आक्रमण गरेको हो । हुथीले आफूहरू इजरायलविरुद्धको लडाइँमा पूर्ण रूपमा सहभागी भएको घोषणा गर्दै थप आक्रमणको चेतावनी पनि दिएका छन् ।
यद्यपि, इजरायली पक्षले अधिकांश क्षेप्यास्त्रहरूलाई आफ्नो प्रतिरक्षा प्रणालीमार्फत अवरोध गरेको जनाएको छ ।
विश्लेषकहरूका अनुसार हुथीहरूको यो प्रवेशले मध्यपूर्वको युद्धलाई अझ जटिल र व्यापक बनाउने जोखिम बढाएको छ । इरानसँग नजिक रहेका अन्य समूहहरू पनि सक्रिय हुन सक्ने संकेत देखिएको छ । यसले द्वन्द्वलाई बहुपक्षीय युद्धतर्फ मोड्ने सम्भावना बढाएको छ ।
यो घटनाले क्षेत्रीय सुरक्षा स्थिति अझ तनावपूर्ण बनेको छ । होर्मुज जलडमरू र बब अल-मन्डेब स्ट्रेट जस्ता महत्वपूर्ण समुद्री मार्गमा पहिलेदेखि नै जोखिम बढेको अवस्थामा हुथीहरूको आक्रमणले विश्व ऊर्जा आपूर्तिमा थप दबाब पर्न सक्ने देखिन्छ ।
प्रकाशित मिति: १४ चैत्र २०८२, शनिबार
प्रतिक्रिया