काठमाडौं। नेपाली कांग्रेसका पूर्वकार्यवाहक सभापति पूर्णबहादुर खड्काले पार्टीभित्र समानान्तर गतिविधि तीव्र बनाएका छन् ।
खड्काले चैत १९ गते धुम्बराहीस्थित स्मार्ट पार्टी प्यालेसमा जिल्ला सभापतिहरूको भेला बोलाएका छन् । त्यसअघि चैत १७ र १८ गते १४औँ महाधिवेशनबाट निर्वाचित केन्द्रीय समितिको बैठक पनि राखिएको छ ।
पार्टीको आधिकारिकता विवाद सर्वोच्च अदालतमा विचाराधीन रहेको अवस्थामा पूर्णबहादुर खड्काले यी समानान्तर बैठकहरू बोलाएका हुन् ।
देउवा पक्षले गगन थापालाई सभापतिको रूपमा अझै स्वीकार नगरेको अवस्थामा खड्काको यो कदमलाई गगन थापा नेतृत्वविरुद्धको कडा काउन्टरका रूपमा हेरिएको छ । यसअघि पनि खड्काको संयोजनमा डा. शेखर कोइराला लगायत शीर्ष नेताहरूले अलग–अलग बैठक र छलफल गर्दै आएका थिए ।
पूर्वप्रधानमन्त्री केपी शर्मा ओली र पूर्वगृहमन्त्री रमेश लेखक पक्राउको विरोधमा खड्काले कार्यवाहक सभापतिको हैसियतमा विज्ञप्ति जारी गरेपछि पार्टीभित्रको विवाद थप चर्किएको थियो ।
देउवा पक्षको समानान्तर गतिविधि बढेपछि गगन थापा नेतृत्वले अनुशासन समितिको बैठक बोलाएको छ ।
यो घटनाक्रमले नेपाली कांग्रेस फेरि गम्भीर विभाजनको संघारमा पुगेको स्पष्ट संकेत दिएको छ ।
प्रकाशित मिति: १६ चैत्र २०८२, सोमबार
प्रतिक्रिया