काठमाडौँ । काठमाडौँ उपत्यका अपराध अनुसन्धान कार्यालयले सस्तो दरमा अमेरिकी डलर साटिदिने बहानामा सर्वसाधारणलाई ठगी गर्ने दुई जनालाई पक्राउ गरेको छ ।
नुवाकोटका दीपक थापालाई १२ हजार ६ सय अमेरिकी डलर सस्तोमा दिने प्रलोभन देखाएर ३ लाख रुपैयाँ ठगी गरी फरार रहेका उनीहरूलाई प्रहरीले कलङ्कीस्थित नाग मन्दिर क्षेत्रबाट नियन्त्रणमा लिएको हो । पक्राउ पर्नेमा नुवाकोट शिवपुरीका २८ वर्षीय सुवास तामाङ (सरोज) र मकवानपुर थाहा नगरपालिकाका २७ वर्षीय गौरव स्याङ्तान (पासाङ) रहेका छन् ।
प्रारम्भिक अनुसन्धानका अनुसार उनीहरूले आफूहरू ट्रेकिङ वा भरियाको काम गर्ने व्यक्ति भएको नाटक गर्दै बाढीपहिरोमा डलर तथा अन्य विदेशी मुद्रा फेला पारेको भन्दै सर्वसाधारणलाई विश्वासमा पार्ने गरेका थिए । त्यसपछि सस्तोमा डलर दिने लोभ देखाई नगद रकम लिएपछि फरार हुने गरेको खुलेको छ ।
प्रहरीले उनीहरूको साथबाट ५ थान सिम कार्ड र ३ थान मोबाइल बरामद गरेको जनाएको छ ।
पक्राउ परेकामध्ये सुवास तामाङ पुरानो आपराधिक पृष्ठभूमि भएका व्यक्ति रहेको प्रहरीले जनाएको छ । उनी यसअघि २०७१ सालमा घर चोरी मुद्दामा जिल्ला अदालत काठमाडौँबाट कैद र जरिवानाको सजाय भोगिसकेका छन् । साथै, उनी चार पटकसम्म मोटरसाइकल चोरी मुद्दामा समेत पक्राउ परिसकेको तथ्य खुलेको छ ।
दुवै जनालाई थप अनुसन्धान तथा कानुनी कारबाहीका लागि प्रहरी वृत्त थानकोट पठाइएको प्रहरीले जानकारी दिएको छ ।
प्रकाशित मिति: १९ चैत्र २०८२, बिहिबार
प्रतिक्रिया