काठमाडौं। राष्ट्रिय स्वतन्त्र पार्टीकी सांसद क्रान्तिशिखा धितालले जेनजी आन्दोलनका शहीद परिवार, घाइते, सुरक्षाकर्मी र कर्मचारीमा देखिएको मनोसामाजिक समस्या विकराल रहेको बताउँदै यसप्रति संवेदनशील हुन आग्रह गरेकी छन् ।
प्रतिनिधिसभाको शून्य समयमा बोल्दै सांसद धितालले मानसिक स्वास्थ्य समस्यालाई नजरअन्दाज गर्ने वा लुकाउने प्रवृत्ति रहेको भन्दै संसदको ध्यानाकर्षण गराइन् ।
उनले भनिन्, “हामीमध्ये जोकोही मनोसामाजिक समस्या का शिकार हुन सक्छौं, म पनि हुन सक्छु । व्यक्तिको कति ठूलो पद छ वा कद छ भन्ने कुराले हामीभित्रको पीडा वा समस्या परिभाषित हुँदैन ।”
सांसद धितालले जेनजी आन्दोलनले देशलाई ठूला सफलता दिएको उल्लेख गर्दै भनिन्, “यो आन्दोलनको देनले आज संसद् र सरकारमा ठूलो परिवर्तन देखिएको छ । तर सफलतामात्रै नहेरौं, आन्दोलनका शहीद परिवार, घाइते, सुरक्षाकर्मी र कर्मचारीहरूले भोगिरहेको मानसिक स्वास्थ्य समस्यालाई पनि नजरअन्दाज नगर्नुस् ।”
उनले परिवारले समेत मानसिक समस्या झेल्नेहरूलाई पर्याप्त ध्यान र सहयोग दिन नसकेको बताउँदै ठूलो संख्यामा साइको सोसल काउन्सिलर (मनोसामाजिक परामर्शदाता) को खाँचो रहेको औंल्याइन् ।
“तीनै तहका सरकारले मानसिक स्वास्थ्य समस्यालाई गम्भीर एजेन्डा बनाऊन् । नीति निर्माण गर्दा मनोसामाजिक परामर्शदाताहरूका माग सम्बोधन होऊन्,” सांसद धितालको माग छ ।
यो विषयलाई लिएर संसद् र सरकारले तत्काल ध्यान दिनुपर्ने उनको भनाइ छ ।
प्रकाशित मिति: २४ चैत्र २०८२, मंगलबार
प्रतिक्रिया