काठमाडौं । श्रम संस्कृति पार्टीका अध्यक्ष हर्क साम्पाङले देशका विभिन्न स्थानमा सुकुम्वासी बस्ती भत्काइँदै गएको घटनाप्रति आपत्ति जनाएका छन्। उनले विज्ञप्ति जारी गर्दै यस्तो कार्य तत्काल रोक्न सरकारसँग माग गरेका छन्।
विज्ञप्तिमा सरकारले संविधानको धारा ३७(१) विपरीत गरिब तथा सुकुम्वासी नागरिकको बासस्थान भत्काइरहेको आरोप लगाइएको छ। साथै, धारा १६(१) मा उल्लेखित मौलिक अधिकार उल्लंघन भइरहेको उल्लेख गर्दै डर, धम्की र बल प्रयोगमार्फत नागरिकलाई विस्थापित गर्ने कार्यलाई ‘राज्य आतंक’को संज्ञा दिइएको छ।
साम्पाङले दशकौँदेखि बसोबास गर्दै आएका बस्तीहरूमा समयमै व्यवस्थापन नगर्दा समस्या जटिल बनेको बताएका छन्। त्यहाँ बसोबास गर्ने नागरिकले जीवनभरको कमाइ लगानी गरेर घर निर्माण गरेको उल्लेख गर्दै उनले उचित क्षतिपूर्ति र पुनर्बास बिना बस्ती हटाउनु अन्यायपूर्ण हुने बताए।
उनले सरकारलाई सुकुम्वासीलाई बेघर बनाउने नीति त्यागेर व्यवस्थित पुनर्बास र उचित क्षतिपूर्ति सुनिश्चित गर्न आग्रह गरेका छन्। “जनतालाई बेघर बनाएर न सुशासन सम्भव छ, न विकास,” विज्ञप्तिमा उल्लेख गरिएको छ।
प्रकाशित मिति: ११ बैशाख २०८३, शुक्रबार
प्रतिक्रिया