काठमाडौं । शिक्षा, विज्ञान तथा प्रविधिमन्त्री सस्मित पोखरेल र नेपालका लागि चिनियाँ राजदूत चाङ माओमिङबीच शिष्टाचार भेटवार्ता भएको छ ।
सोमबार सिंहदरबारस्थित मन्त्रालयमा भएको भेटमा शिक्षा, विज्ञान तथा प्रविधि तथा खेलकुद क्षेत्रका विविध विषयमा नेपाल–चीनबीचको सहयोग र सहकार्य विस्तारबारे छलफल गरिएको थियो । विशेषगरी विद्यालय पूर्वाधार सुदृढीकरण, पठनपाठनमा डिजिटल प्रणालीको प्रयोग तथा संस्थागत विकाससँग सम्बन्धित विषयमा कुराकानी केन्द्रित रहेको बताइएको छ ।
त्यसैगरी, दुई देशबीचको ऐतिहासिक द्विपक्षीय सम्बन्ध, पारस्परिक सहयोग र समसामयिक मुद्दाहरूमा समेत विचार आदान–प्रदान भएको थियो ।
भेटका क्रममा मन्त्री पोखरेलले विद्यालय पूर्वाधार विकास, डिजिटल शिक्षाको प्रवर्द्धन तथा चीनसँगको सहकार्यलाई थप सुदृढ बनाउने नेपालको अपेक्षा व्यक्त गरे । साथै, शिक्षा क्षेत्रमा सञ्चालन भइरहेका परियोजनाहरू समयमै सम्पन्न गर्न र नेपाली विद्यार्थीका रुचिअनुसार चिनियाँ छात्रवृत्ति अवसर विस्तार गर्न आग्रह गरे ।
राजदूत माओमिङले नेपाल सरकारबाट उठाइएका विषयमा सकारात्मक प्रतिक्रिया जनाउँदै चीन सरकार सहकार्य र साझेदारीका लागि तत्पर रहेको बताए ।
भेटमा दुवै पक्षले आपसी हितमा आधारित बहुआयामिक सम्बन्धलाई अझ सुदृढ र प्रभावकारी बनाउँदै लैजाने सहमति व्यक्त गरेका छन् ।
प्रकाशित मिति: १४ बैशाख २०८३, सोमबार
प्रतिक्रिया