काठमाडौं। डच क्रुज जहाज एमभी होन्डियसमा देखिएको हान्टाभाइरस संक्रमणका बीच जहाजमा दुई भारतीय चालक दलका सदस्य पनि रहेको पुष्टि भएको छ ।
ओशनवाइड एक्सपिडिसनद्वारा सञ्चालित उक्त जहाजमा कुल १४९ जना रहेको र हाल अफ्रिकाको केप भर्डे नजिकै लंगरमा राखिएको जनाइएको छ ।
रिपोर्टअनुसार जहाजमा हान्टाभाइरस संक्रमण फैलिँदा अहिलेसम्म तीन जनाको मृत्यु भइसकेको छ ।
मृतकमध्ये एक डच दम्पती र एक जर्मन यात्री रहेका छन् । गम्भीर बिरामी भएका एक यात्रुलाई उपचारका लागि दक्षिण अफ्रिका पठाइएको छ भने बाँकी संक्रमितहरूको उपचार भइरहेको छ ।
कम्पनीले यात्रु तथा चालक दलका सदस्यहरूको राष्ट्रियता सूची सार्वजनिक गर्दै जहाजमा २३ जना विभिन्न देशका नागरिक रहेको जनाएको छ । यसअघि विस्तृत विवरण सार्वजनिक गरिएको थिएन ।
सूचीअनुसार जहाजमा दुई भारतीय चालक दलका सदस्य रहेका छन् । उनीहरूको नाम, पद तथा स्वास्थ्य अवस्थाबारे भने जानकारी सार्वजनिक गरिएको छैन ।
विश्व स्वास्थ्य संगठन तथा स्थानीय स्वास्थ्य निकायहरूले अवस्थाको निगरानी गरिरहेको जनाइएको छ । जहाजमा रहेका सबैलाई अलग्गै राख्न र कडा सावधानी अपनाउन निर्देशन दिइएको छ ।
विश्व स्वास्थ्य संगठनले क्यानडा, डेनमार्क, जर्मनी, नेदरल्यान्ड, न्युजिल्यान्ड, सेन्ट किट्स र नेभिस, सिङ्गापुर, स्विडेन, स्विजरल्यान्ड, टर्की, संयुक्त अधिराज्य र संयुक्त राज्य अमेरिका गरी १२ देशका लागि चेतावनी जारी गरेको छ ।
संक्रमण फैलावट सीमित हुने अपेक्षा गरिएको भए पनि थप परीक्षण जारी रहेकाले नयाँ संक्रमित फेला पर्न सक्ने सम्भावना रहेको अधिकारीहरूले बताएका छन् ।
प्रकाशित मिति: २५ बैशाख २०८३, शुक्रबार
प्रतिक्रिया