काठमाडौं । राष्ट्र, राष्ट्रियता, धर्म, संस्कृति तथा नागरिक बचाउ महाअभियानका संयोजक दुर्गा प्रसाईँ ले प्रधानमन्त्री बालेन शाह ले नागरिकको घरमात्र नभई सपना समेत भत्काएको आरोप लगाएका छन् ।
निर्वाचन सम्पन्न भएको दुई महिना नपुग्दै राष्ट्रिय स्वतन्त्र पार्टी लाई मतदान गरेका मतदाता पछुताउने अवस्थामा पुगेको उनले दाबी गरे ।
प्रसाईँले भने, “हिजो विदेशमा रहेका दाजुभाइहरूले घरमा फोन गरेर घण्टीमा भोट नहाले घर नै आउँदिन भनेर घुर्की लगाए । आज नेपालबाट आमाबुबाले भनिरहेका छन्, अब घर नै छैन, कुन घर फर्किन्छस् ?”
उनले सुरुदेखि नै बालेन नेतृत्वको सरकार अमेरिकाको चाहनामा बनेको बताउँदै आएको उल्लेख गरे । अहिलेका गतिविधिले आफ्नो आरोप पुष्टि भएको उनको दाबी छ ।
प्रसाईँले सरकारले न्यायालयमाथि पनि हस्तक्षेप गरेको आरोप लगाए । चौथो वरीयताका न्यायाधीशलाई प्रधानन्यायाधीश सिफारिस गरेर सरकारले न्याय प्रणालीको गरिमा कमजोर बनाएको उनको भनाइ छ ।
प्रकाशित मिति: २६ बैशाख २०८३, शनिबार
प्रतिक्रिया