काठमाडौं । स्वास्थ्यमन्त्री निशा मेहताले स्वास्थ्य बीमा प्रणालीमा देखिएका समस्या समाधान गरी यसलाई थप व्यवस्थित र नागरिकमैत्री बनाउने दिशामा सरकार गम्भीर रूपमा अघि बढिरहेको बताएकी छन् ।
सोमबार वीर अस्पताल मा ‘राष्ट्रिय सरसफाइ सप्ताह’ को शुभारम्भ गर्दै उनले स्वास्थ्य बीमामा विद्यमान जटिलताबारे सुधारको आवश्यकता औंल्याइन् ।
स्वास्थ्यमन्त्री निशा मेहताले हालको स्वास्थ्य बीमा प्रणालीमा केही पेचिला पक्षहरू रहेको स्वीकार गर्दै ती समस्यालाई कसरी सरल, प्रभावकारी र सर्वसुलभ बनाउन सकिन्छ भन्ने विषयमा मन्त्रालयस्तरमै गहन अध्ययन र छलफल भइरहेको जानकारी दिइन् ।
उनका अनुसार स्वास्थ्य बीमा सुधारसम्बन्धी कार्ययोजना अन्तिम चरणमा पुगेको छ र निकट भविष्यमै नागरिकलाई सहज हुनेगरी नयाँ व्यवस्था सार्वजनिक गरिनेछ ।
‘स्वास्थ्य बीमामा केही जटिलता छन्, त्यसलाई कसरी सहजीकरण गर्ने र जनमैत्री बनाउने भन्नेबारे हामी गम्भीर रूपमा काम गरिरहेका छौँ,’ उनले भनिन्, ‘प्रक्रिया अन्तिम चरणमा छ, चाँडै नै यसबारे स्पष्ट जानकारी आउनेछ ।’
प्रकाशित मिति: २८ बैशाख २०८३, सोमबार
प्रतिक्रिया