काठमाडौं । राष्ट्रपति रामचन्द्र पौडेलले प्रतिनिधिसभाका सचिव हर्कराज राईलाई पदबाट हटाएका छन् ।
राष्ट्रपति कार्यालयका अनुसार सभामुख डोलप्रसाद अर्यालको सिफारिसका आधारमा राईलाई २०८३ वैशाख २९ गतेदेखि लागू हुने गरी पदमुक्त गरिएको हो ।
राष्ट्रपति कार्यालयका प्रवक्ता रितेशकुमार शाक्यद्वारा जारी विज्ञप्तिमा संघीय संसद्का महासचिव, प्रतिनिधिसभाका सचिव तथा राष्ट्रियसभाका सचिवको पारिश्रमिक, सेवा सर्त र सुविधा सम्बन्धी ऐन, २०७५ को दफा ६ (ङ) अनुसार उनलाई हटाइएको उल्लेख गरिएको छ ।
यसअघि सभामुख अर्यालले वैशाख १७ गते राईसँग स्पष्टीकरण माग गरेका थिए । सोही अनुरूप राईले वैशाख २१ गते आफ्नो जवाफ बुझाएका थिए ।
उक्त ऐनअनुसार कार्यक्षमतामा कमजोरी देखिएमा वा जिम्मेवारीप्रति जवाफदेही नदेखिएको अवस्थामा स्पष्टीकरण सोधेर राष्ट्रपतिसमक्ष पदमुक्तिका लागि सिफारिस गर्न सकिने व्यवस्था छ । हटाउनुअघि सफाइको अवसर दिनुपर्ने प्रावधान अनुसार नै राईसँग स्पष्टीकरण माग गरिएको थियो ।
राई यसअघि तत्कालीन सभामुख देवराज घिमिरेको सिफारिसमा २०८१ पुस १६ गते प्रतिनिधिसभाका सचिव पदमा नियुक्त भएका थिए ।
संविधानको धारा १०६ (१) अनुसार सभामुखको सिफारिसमा राष्ट्रपतिले सचिव नियुक्त गर्ने व्यवस्था रहेको छ ।
प्रकाशित मिति: २९ बैशाख २०८३, मंगलबार
प्रतिक्रिया