बेइजिङ। चीनले अमेरिकी विमान निर्माता कम्पनी बोइङसँग २०० विमान खरिद गर्ने औपचारिक घोषणा गरेको छ।
यो महत्वपूर्ण सम्झौता अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी जिनपिङबीच बेइजिङमा भएको शिखर वार्तापछि सार्वजनिक भएको हो।
यो सम्झौतालाई विश्वका दुई ठूला अर्थतन्त्रबीचको व्यापार सम्बन्ध सुधार्ने दिशाको ठूलो कदमका रूपमा हेरिएको छ।
चीनको वाणिज्य मन्त्रालयका अनुसार उक्त सम्झौताअन्तर्गत अमेरिकाले विमानका इन्जिन तथा अन्य पार्टपुर्जा आपूर्तिको ग्यारेन्टी दिनेछ।
यससँगै दुवै देशले अघिल्लो अतिरिक्त भन्सार महसुल (ट्यारिफ) माथिको अस्थायी युद्धविरामलाई थप विस्तार गर्ने र करिब ३० अर्ब डलरभन्दा बढी मूल्यका वस्तुहरूमा भन्सार शुल्क घटाउने सहमति पनि गरेका छन्।
बोइङका प्रमुख कार्यकारी अधिकृत केली ओर्टबर्गले यो सम्झौता प्रारम्भिक चरण मात्र भएको बताएका छन्।
उनले भविष्यमा थप अर्डर आउन सक्ने र कुल अर्डर ७५० विमानसम्म पुग्न सक्ने सम्भावना रहेको उल्लेख गरेका छन्।
राष्ट्रपति ट्रम्पले पनि यो सम्झौतालाई ठूलो व्यापारिक उपलब्धिका रूपमा प्रस्तुत गरेका छन्।
यो घोषणा अमेरिका र चीनबीच लामो समयदेखि जारी व्यापार तनावलाई कम गर्ने प्रयासस्वरूप आएको छ।
यसअघि गत वर्ष अक्टोबरमा दुवै पक्षबीच अतिरिक्त ट्यारिफ हटाउने, केही कर कटौती गर्ने र दुर्लभ खनिज निर्यातमा अस्थायी रोक लगाउने सहमति भएको थियो।
सी जिनपिङले रुसी राष्ट्रपति भ्लादिमिर पुटिनसँग उच्चस्तरीय वार्ता गरिरहेको समयमा यो घोषणा भएको हो।
प्रकाशित मिति: ६ जेष्ठ २०८३, बुधबार
प्रतिक्रिया