काठमाडौं । नेकपा एमालेको सचिवालय बैठक भोलि पुनः बस्ने गरी स्थगित भएको छ । पार्टी अध्यक्ष केपी शर्मा ओलीको गुण्डुस्थित निवासमा शुक्रबार करिब ६ घण्टासम्म बसेको बैठकमा उपाध्यक्षहरूले धारणा राखेपछि बैठक शनिबारका लागि सारिएको उपमहासचिव लेखराज भट्टले जानकारी दिएका छन् ।
उनका अनुसार बैठक शनिबार बिहान ११ः३० बजे पुनः बस्नेछ । उनले भने, ‘आज पाँच जना उपाध्यक्षले लामो समय बोल्नुभयो अब १२ जना उपाध्यक्षको धारणा आउन बाँकी छ।’
बैठकमा नेताहरूले कार्य विभाजनसम्बन्धी प्रस्तावबारे धारणा राखिरहेका छन् । यस क्रममा आएका सुझावका आधारमा प्रस्तावित नामहरूमा संशोधन हुन सक्ने उपमहासचिव भट्टले बताएका छन् ।
पार्टी अध्यक्ष ओलीले नेताहरूको कार्य विभाजनसम्बन्धी प्रस्ताव सोमबारको बैठकमा प्रस्तुत गरेका थिए । सोही प्रस्तावमाथि नेताहरूले आ–आफ्ना धारणा राखिरहेका छन् ।
तर आजको छलफलमा नेताहरू विशेषगरी आगामी निर्वाचनसम्बन्धी विषयमा केन्द्रित भएपछि कार्य विभाजनबारे विस्तृत छलफल भने अघि बढ्न नसकेको सहभागी नेताहरूले बताएका छन् ।
प्रकाशित मिति: ८ जेष्ठ २०८३, शुक्रबार
प्रतिक्रिया