काठमाडौं । सभामुख डोलप्रसाद (डीपी) अर्यालले विगतका सरकारहरूको कार्यशैलीप्रति असन्तुष्टि जनाउँदै जनताको आधारभूत आवश्यकतामै अझै बहस गर्नुपर्ने अवस्था आउनु दुःखद भएको बताएका छन् ।
नागार्जुन नगरपालिकाले आयोजना गरेको वार्षिक नीति तथा कार्यक्रमसम्बन्धी छलफल कार्यक्रममा बोल्दै सभामुख अर्यालले अघिल्ला सरकारहरूले जनअपेक्षाअनुसार प्रभावकारी काम गर्न नसकेको टिप्पणी गरे । उनले राजधानी काठमाडौंमै सडक, खानेपानीलगायत आधारभूत सेवाका विषयमा अझै समस्या कायम रहनुले विगतको शासन व्यवस्थाको कमजोरी उजागर गरेको बताए ।
उनले विकासका आधारभूत विषयलाई राजनीतिक स्वार्थसँग जोडेर हेर्ने प्रवृत्ति अन्त्य हुनुपर्नेमा जोड दिए । विशेषगरी सडक र खानेपानीजस्ता जनजीवनसँग प्रत्यक्ष सम्बन्धित क्षेत्रमा राजनीति गर्न नहुने उनको भनाइ थियो ।
सभामुख अर्यालले नयाँ सरकार र ताजा जनादेशसहित आएका जनप्रतिनिधिहरूप्रति आशा व्यक्त गर्दै अबको ध्यान जनमुखी विकास, सुशासन र प्रभावकारी सेवा प्रवाहमा केन्द्रित हुनुपर्ने बताए । साथै, जनताको विश्वास जित्ने गरी काम गर्न सबै जनप्रतिनिधिलाई आग्रह समेत गरे ।
प्रकाशित मिति: ११ जेष्ठ २०८३, सोमबार
प्रतिक्रिया