तेहरान। इरानले स्ट्रेट अफ होर्मुजको व्यवस्थापन गर्नु आफ्नो कानुनी अधिकार भएको बताएको छ ।
इरानका सर्वोच्च नेता आयतुल्ला मोज्तबा खामेनीका सैन्य सल्लाहकार मोहसेन रेजाईले देशको राष्ट्रिय सुरक्षा सुनिश्चित गर्न स्ट्रेट अफ होर्मुजको व्यवस्थापन इरानको कानुनी अधिकार भएको स्पष्ट पारेका छन् ।
‘इरानद्वारा होर्मुज जलडमरूमध्यको व्यवस्थापनले फारसी खाडी क्षेत्रमा ५० वर्षदेखिको असुरक्षाको अन्त्य गरेको छ,’ रेजाईको भनाइलाई उद्धृत गर्दै इरानी सञ्चारमाध्यमले समाचार प्रकाशित गरेका छन् ।
फेब्रुअरीको अन्त्यमा अमेरिका र इजरायलले इरानमाथि आक्रमण गरेर युद्ध सुरु गरेपछि इरानले स्ट्रेट अफ होर्मुजलाई आफ्नो नियन्त्रणमा लिएको थियो ।
यसको जवाफमा अमेरिकाले इरानी बन्दरगाहहरूमाथि प्रतिबन्ध लगाएको छ ।
स्ट्रेट अफ होर्मुज विश्व ऊर्जा आपूर्तिका लागि अत्यन्त महत्वपूर्ण समुद्री मार्ग मानिन्छ । यहाँबाट विश्व बजारमा ठूलो परिमाणमा तेल ओसारपसार हुँदै आएको छ ।
प्रकाशित मिति: ११ जेष्ठ २०८३, सोमबार
प्रतिक्रिया