काठमाडौं। अमेरिकी सेना ले पूर्वी प्रशान्त महासागरमा सञ्चालन गरेको एक सैन्य कारबाहीमा तीन जना लागुऔषध तस्करको मृत्यु भएको छ।
अमेरिकी अधिकारीहरूका अनुसार शुक्रबार गरिएको उक्त आक्रमण लागुऔषध तस्करीविरुद्ध सञ्चालन भइरहेको अभियानअन्तर्गत गरिएको हो।
अमेरिकी दक्षिणी कमान्ड (यूएस साउदर्न कमान्ड) ले सामाजिक सञ्जालमार्फत जानकारी दिँदै लक्षित गरिएको डुङ्गा अन्तर्राष्ट्रिय जलक्षेत्रमा लागुऔषध तस्करीसँग सम्बन्धित गतिविधिमा संलग्न रहेको जनाएको छ।
कारबाहीका क्रममा डुङ्गा पूर्ण रूपमा नष्ट भएको र त्यसमा सवार तीन जनाको मृत्यु भएको बताइएको छ।
सार्वजनिक गरिएको भिडियो फुटेजमा खुला समुद्रमा रहेको डुङ्गालाई शक्तिशाली विस्फोटमार्फत ध्वस्त पारिएको देखिन्छ।
अमेरिकी पक्षले यसलाई अन्तर्राष्ट्रिय लागुऔषध तस्करी सञ्जालविरुद्धको सफल अपरेसनका रूपमा चित्रण गरेको छ।
समाचार संस्था एएफपीका अनुसार पछिल्लो एक साताभित्र यो तेस्रो घातक सैन्य कारबाही हो।
ट्रम्प प्रशासनले गत सेप्टेम्बरदेखि सुरु गरेको ‘अपरेसन साउदर्न स्पियर’ अन्तर्गत हालसम्म कम्तीमा १९८ जनाको मृत्यु भइसकेको बताइएको छ।
अमेरिकी राष्ट्रपति डोनाल्ड ट्रम्पले ल्याटिन अमेरिकी क्षेत्रबाट सञ्चालन हुने लागुऔषध तस्करीलाई अमेरिकाको राष्ट्रिय सुरक्षामाथिको गम्भीर चुनौतीका रूपमा व्याख्या गर्दै यसविरुद्ध कडा अभियान सञ्चालन गरिरहेको बताएका छन्।
उनका अनुसार सीमापार अपराध नियन्त्रण र लागुऔषधको अवैध कारोबार रोक्न सैन्य तथा सुरक्षा निकायहरूलाई व्यापक अधिकार दिइएको छ।
यद्यपि, अमेरिकी सैन्य कारबाहीमाथि मानवअधिकार तथा कानुनी क्षेत्रबाट प्रश्नसमेत उठ्न थालेका छन्।
विभिन्न अधिकारवादी संस्था र अन्तर्राष्ट्रिय कानुनका विज्ञहरूले प्रत्यक्ष रूपमा अमेरिकामाथि तत्काल सुरक्षा खतरा उत्पन्न नगर्ने व्यक्तिलाई लक्षित गरी गरिने सैन्य आक्रमणहरू गैरन्यायिक हत्या (एक्स्ट्राजुडिसियल किलिङ) को श्रेणीमा पर्न सक्ने चेतावनी दिएका छन्।
उनीहरूले यस्ता कारबाहीमा पारदर्शिता, कानुनी आधार र मानवअधिकारको सम्मान सुनिश्चित हुनुपर्नेमा जोड दिएका छन्।
अर्कोतर्फ अमेरिकी प्रशासनले भने अन्तर्राष्ट्रिय अपराध सञ्जालविरुद्धको अभियानलाई अझ प्रभावकारी बनाउँदै लैजाने संकेत दिएको छ।
पूर्वी प्रशान्त क्षेत्रमा पछिल्ला महिनाहरूमा लागुऔषध तस्करी नियन्त्रणका लागि अमेरिकी सुरक्षा निकायको सक्रियता उल्लेखनीय रूपमा बढेको छ।
विशेषगरी कोकिन तथा अन्य प्रतिबन्धित पदार्थको अवैध ढुवानी रोक्न समुद्री निगरानी र सैन्य कारबाहीलाई तीव्र पारिएको अमेरिकी अधिकारीहरूको भनाइ छ।
प्रकाशित मिति: १६ जेष्ठ २०८३, शनिबार
प्रतिक्रिया