काठमाडौं । नेकपा (एमाले) ले प्रतिनिधिसभाका सभामुख डोलप्रसाद अर्यालले व्यक्त गरेका केही भनाइहरू संसदीय अभिलेखबाट हटाउन माग गरेको छ ।
प्रतिनिधिसभा नियमावलीको नियम ५६ सम्बन्धी व्यवस्था सभामुखबाट गलत रूपमा व्याख्या गरिएको आरोप लगाउँदै एमालेका प्रमुख सचेतक ऐनबहादुर महरले उक्त माग राखेका हुन् ।
रोष्ट्रमबाट सभामुखले प्रधानमन्त्रीसँग हुने प्रश्नोत्तरका लागि प्रश्न तीन दिनअघि नै बुझाउनुपर्ने कुनै व्यवस्था नरहेको बताएका थिए । तर एमालेले सो भनाइ नियमावली विपरीत भएको दाबी गर्दै आपत्ति जनाएको छ ।
‘प्रधानमन्त्रीसँग प्रश्नोत्तरका लागि तीन दिनअघि प्रश्न बुझाउने व्यवस्था छैन भनेर रोष्ट्रमबाट भनियो, जुन प्रतिनिधिसभा नियमावलीसँग मेल खाँदैन,’ महरले भने, ‘यसप्रति म नियमापत्ति जनाउँदै उक्त भनाइलाई संसदीय रेकर्डबाट हटाउन माग गर्दछु।’
आइतबारको प्रतिनिधिसभा बैठकमा प्रधानमन्त्री बालेन्द्र शाहले सांसदहरूले उठाएका प्रश्नहरूको आकस्मिक रूपमा जवाफ दिएका थिए ।
यसै सन्दर्भमा प्रधानमन्त्रीसँग प्रत्यक्ष प्रश्नोत्तर कार्यक्रमका लागि प्रश्न तीन दिनअघि नै सभामुखलाई बुझाउनुपर्ने प्रावधान रहेको भन्दै विपक्षी सांसदहरूले आपत्ति जनाएका थिए । तर सभामुख अर्यालले त्यस्तो स्पष्ट व्यवस्था नभएको बताएका थिए ।
सभामुखको उक्त व्याख्याप्रति असहमति जनाउँदै एमालेले नियमापत्ति दर्ता गरेको हो ।
प्रकाशित मिति: १७ जेष्ठ २०८३, आइतबार
प्रतिक्रिया