काठमाडौं । भक्तपुरमा ट्र्याक्टर दुर्घटना: दुई जनाको मृत्यु, नौ जना घाइते
भक्तपुरको चाँगुनारायण नगरपालिका–८ स्थित मञ्जुश्री गुम्बानजिक ट्र्याक्टर दुर्घटना हुँदा दुई जनाको मृत्यु भएको छ भने नौ जना घाइते भएका छन्।
भक्तपुरतर्फ फर्किंदै गरेको ट्र्याक्टर पल्टिएर च्यापिँदा भोजपुर नगरपालिका स्थायी घर भई हाल काठमाडौंको सिनामंगल बस्दै आएका ३२ वर्षीय विजय राई र सिन्धुली घर भई हाल सिनामंगल बस्ने २६ वर्षीय हेमबहादुर नेपालीको मृत्यु भएको जिल्ला प्रहरी परिसर भक्तपुरका प्रहरी उपरीक्षक सूर्यबहादुर खड्काले जानकारी दिएका छन्।
प्रहरीका अनुसार कलमसीस्थित एक होटलमा ढलानको काम सम्पन्न गरी १२ जना मजदुर बोकेर फर्किरहेको ट्र्याक्टरको ब्रेक फेल भएपछि दुर्घटना भएको हो। दुर्घटनामा घाइते भएका मजदुरहरूको भक्तपुरका विभिन्न अस्पतालमा उपचार भइरहेको प्रहरीले जनाएको छ।
प्रकाशित मिति: २१ जेष्ठ २०८३, बिहिबार
प्रतिक्रिया