काठमाडौं । इरानको इस्लामिक रिभोल्युसनरी गार्ड कर्प्स (आईआरजीसी) ले बहराइनस्थित अमेरिकी नौसेनाको फिफ्थ फ्लिटलाई लक्षित गर्दै ड्रोन आक्रमण गरेको दाबी गरेको छ। इरानी सरकारी सञ्चारमाध्यमका अनुसार दक्षिण इरानका केशम र बन्दर अब्बास क्षेत्रमा भएको अमेरिकी हमलाको जवाफस्वरूप उक्त आक्रमण गरिएको हो।
आईआरजीसीले अमेरिकाले जास्क, सिरिक र केशम द्वीपमा पनि हमला गरेको आरोप लगाएको छ। इरानी पक्षका अनुसार सिरिकमा रहेको एक सञ्चार टावरमा क्षति पुगेको छ भने दुई वटा पानीका ट्यांकीसमेत प्रभावित भएका छन्।
इरानले अमेरिकी सैन्य कारबाही जारी रहे थप कडा जवाफी कदम चाल्ने चेतावनी दिएको छ। आईआरजीसीले दुवै पक्षबीचको तनाव अझै समाप्त नभएको जनाएको छ।
यद्यपि, इरानले आक्रमण गरेको दाबी गरे पनि अमेरिकी सेनाले बहराइनस्थित फिफ्थ फ्लिटमा कुनै हमला भएको पुष्टि गरेको छैन। बहराइनमा अवस्थित अमेरिकी फिफ्थ फ्लिट पश्चिम एसियामा अमेरिकाको सबैभन्दा महत्त्वपूर्ण नौसैनिक अड्डामध्ये एक मानिन्छ, जसले फारसको खाडी, अरब सागर र होर्मुज जलडमरूमध्यजस्ता रणनीतिक समुद्री क्षेत्रहरूको निगरानी गर्दै आएको छ।
प्रकाशित मिति: २७ जेष्ठ २०८३, बुधबार
प्रतिक्रिया