एजेन्सी । रुसले सोमबार युक्रेनका विभिन्न क्षेत्रमा व्यापक हवाई आक्रमण गर्दा पूर्वी सहर खार्किभमा पाँच उद्धारकर्मीको मृत्यु भएको छ भने राजधानी किएभमा कम्तीमा २० जना घाइते भएका छन्। आक्रमणबाट आवासीय भवन, नागरिक पूर्वाधार तथा ऐतिहासिक धार्मिक सम्पदामा समेत क्षति पुगेको युक्रेनी अधिकारीहरूले बताएका छन्।
युक्रेनका गृहमन्त्री इहोर क्लाइमेन्कोका अनुसार खार्किभमा प्रारम्भिक आक्रमणपछि लागेको आगो नियन्त्रण गर्न पुगेका उद्धारकर्मीहरू दोस्रो आक्रमणको निशानामा परेका थिए। उक्त घटनामा पाँच जनाको ज्यान गएको र अन्य पाँच आपतकालीन सेवाकर्मी घाइते भएको उनले जानकारी दिए।
राजधानी किएभमा रातभर क्षेप्यास्त्र र ड्रोन आक्रमणका कारण शक्तिशाली विस्फोटहरू सुनिएका थिए। ब्यालिस्टिक मिसाइल र शाहेद ड्रोन प्रयोग गरी गरिएको आक्रमणपछि ठूलो संख्यामा सर्वसाधारणले भूमिगत आश्रयस्थलमा शरण लिन बाध्य भएका थिए। सुरक्षा निकायले नागरिकलाई सुरक्षित स्थानमा बस्न आग्रह गरेको थियो।
गृहमन्त्री क्लाइमेन्कोले किएभ आक्रमणको मुख्य लक्ष्य बनेको उल्लेख गर्दै नागरिक पूर्वाधारमा उल्लेखनीय क्षति पुगेको बताए।
किएभ सहर सैन्य प्रशासनका प्रमुख टिमुर तकाचेन्कोका अनुसार एक बालकसहित कम्तीमा २० जना घाइते भएका छन्। उनले शेभचेन्किभ्स्की जिल्लामा आधा घण्टाभन्दा कम समयमा पाँचवटा आक्रमण भएको जानकारी दिए।
आक्रमणबाट २५ तले आवासीय भवन, स्थानीय बजार र किराना पसल प्रभावित भएका छन्। ओबोलोन्स्की जिल्लाको नौ तले आवासीय भवनमा प्रत्यक्ष प्रहार भएको अधिकारीहरूले बताएका छन्।
तकाचेन्कोले रुसले जानाजानी आवासीय क्षेत्र र नागरिक संरचनालाई निशाना बनाएको आरोप लगाएका छन्। उनका अनुसार यो आक्रमण सैन्य लक्ष्यभन्दा बढी नागरिक क्षेत्रमा केन्द्रित देखिएको छ।
यसैबीच, आक्रमणबाट युक्रेनको ऐतिहासिक तथा धार्मिक सम्पदाका रूपमा परिचित किएभ–पेचेस्र्क लाभ्रा मठ परिसरमा पनि क्षति पुगेको छ। परिसरभित्र आगलागी भएको र केही संरचनामा नोक्सानी पुगेको तकाचेन्कोले बताएका छन्।
युक्रेनको अर्थोडक्स चर्चका प्रमुख मेट्रोपोलिटन एपिफेनियसका अनुसार रातभरको आक्रमणका क्रममा डोर्मिशन क्याथेड्रलको छानामा आगलागी भएको थियो। उनले यस घटनालाई इतिहास, संस्कृति र धार्मिक सम्पदामाथिको आक्रमणका रूपमा टिप्पणी गरेका छन्।
‘गुफाहरूको मठ’का नामले समेत परिचित किएभ–पेचेस्र्क लाभ्रा ११औँदेखि १९औँ शताब्दीसम्म निर्माण गरिएका चर्च, मठ र भूमिगत गुफाहरूको विशाल धार्मिक परिसर हो। यो युनेस्को विश्व सम्पदा सूचीमा सूचीकृत स्थलका रूपमा परिचित छ।
डनिप्रो नदीको किनारमा अवस्थित यो ऐतिहासिक धार्मिक केन्द्र शताब्दीयौँदेखि पूर्वी युरोपका प्रमुख तीर्थस्थलमध्ये एक मानिन्छ। पछिल्लो आक्रमणले युक्रेनको सांस्कृतिक सम्पदा र नागरिक सुरक्षामाथि परेको जोखिमलाई पुनः उजागर गरेको छ।
प्रकाशित मिति: १ असार २०८३, सोमबार
प्रतिक्रिया