खामेनीको अन्त्येष्टिमा तेहरानमा विशाल शोक जुलुस, बदलाको नारा

काठमाडौं। इरानका सर्वोच्च नेता आयातोल्लाह अली खामेनीको अन्तिम संस्कारका लागि सोमबार राजधानी तेहरानमा विशाल शोक जुलुस निकालिएको छ। हजारौं नागरिकको सहभागितामा उनको पार्थिव शरीर राष्ट्रिय झण्डाले ढाकिएको कफिनमा राखी तेहरानका मुख्य सडक हुँदै मेहराबाद अन्तर्राष्ट्रिय विमानस्थलतर्फ लगिएको छ।

इरानी सरकारी सञ्चारमाध्यमका अनुसार फेब्रुअरी २८ मा इजरायल र अमेरिकाको हवाई आक्रमणमा खामेनीको मृत्यु भएपछि देशभर राष्ट्रिय शोक मनाइएको छ। शनिबारदेखि सुरु भएको शोक अवधि बिहीबारसम्म रहनेछ भने त्यसपछि उनको जन्मस्थान मशहदस्थित इमाम रेजा मन्दिर परिसरमा अन्त्येष्टि गरिने कार्यक्रम छ।

अन्त्येष्टिलाई लक्षित गर्दै सुरक्षा व्यवस्था कडा पारिएको छ। सडक, हवाई क्षेत्र र सार्वजनिक गतिविधिमा विशेष प्रतिबन्ध लगाइएको छ। यसैबीच, अमेरिकाले हर्मुज जलघाँटी सञ्चालन, इरानको आणविक कार्यक्रम र युद्ध अन्त्यबारे वार्ता अघि बढाउन दबाब दिए पनि अन्त्येष्टि सम्पन्न नभएसम्म वार्ता अघि नबढ्ने संकेत देखिएको छ।

शोक जुलुसमा सहभागीहरूले खामेनीको मृत्युको बदला लिनुपर्ने नारासमेत लगाएका छन्। केही प्रदर्शनकारीले अमेरिकी राष्ट्रपति डोनाल्ड ट्रम्प र इजरायली प्रधानमन्त्री बेन्जामिन नेतान्याहुविरुद्ध आक्रोश व्यक्त गरेका प्लेकार्ड प्रदर्शन गरेका थिए।

यद्यपि इरानले ट्रम्पविरुद्ध कुनै हत्या षड्यन्त्र रहेको आरोप अस्वीकार गर्दै आएको छ। जुलुसमा सहभागी एक नागरिकले खामेनीप्रति अन्तिम श्रद्धाञ्जलि अर्पण गर्दै उनको मृत्युको बदला लिने प्रतिबद्धता व्यक्त गरेका छन्।

प्रकाशित मिति: २२ असार २०८३, सोमबार