एजेन्सी । स्ट्रेट अफ होर्मुजमा तीनवटा तेल ट्याङ्करमाथि भएको आक्रमणपछि अमेरिकाले इरानका दर्जनौँ सैन्य संरचनामाथि व्यापक हवाई आक्रमण गरेको छ। अमेरिकी सेनाको केन्द्रीय कमाण्ड (सेन्टकम)का अनुसार मंगलबार सञ्चालन गरिएको कारबाहीमा ८० भन्दा बढी सैन्य लक्ष्यलाई निशाना बनाइएको हो।
सेन्टकमले जारी गरेको विवरणअनुसार इस्लामिक रिभोलुसनरी गार्ड कर्प्स (आईआरजीसी)सँग सम्बन्धित ६० भन्दा बढी साना सैन्य डुङ्गा, क्षेप्यास्त्र प्रक्षेपण केन्द्र तथा विभिन्न सैन्य कमाण्ड संरचनामाथि आक्रमण गरिएको छ। यद्यपि, आक्रमण भएका सबै स्थानको विस्तृत विवरण भने सार्वजनिक गरिएको छैन।
इरानी सञ्चारमाध्यमका अनुसार केश्म टापु, बन्दर अब्बास र सिरिक क्षेत्रमा अमेरिकी हवाई हमला भएको छ। विस्फोटका क्रममा केही सर्वसाधारण घाइते भएको जनाइएको छ।
अमेरिकी आक्रमणप्रति प्रतिक्रिया दिँदै इरानका उपविदेशमन्त्रीले यसलाई गत महिना दुई देशबीच भएको समझदारी सम्झौताको स्पष्ट उल्लङ्घन भएको बताएका छन्। उनले राष्ट्रिय सुरक्षा र हितको रक्षा गर्न तेहरानले आवश्यक र निर्णायक कदम चाल्ने चेतावनी दिएका छन्।
यता, तीन तेल ट्याङ्करमाथि भएको आक्रमणको जिम्मेवारी इरानले औपचारिक रूपमा स्वीकार गरेको छैन। अमेरिकाले भने अन्तर्राष्ट्रिय जलमार्गमा सञ्चालनमा रहेका व्यावसायिक जहाजमाथिको आक्रमण अस्वीकार्य रहेको उल्लेख गर्दै आफ्नो सैन्य कारबाही त्यसकै प्रतिउत्तर भएको जनाएको छ।
यसअघि अमेरिकी अर्थ मन्त्रालयले इरानमाथिको तेल प्रतिबन्ध आंशिक रूपमा खुकुलो बनाउने व्यवस्था पनि रद्द गरेको थियो। उक्त निर्णय गत महिना भएको द्विपक्षीय समझदारीको एक हिस्सा मानिएको थियो। इरानको विदेश मन्त्रालयले भने वासिङ्टनको यो कदमलाई सम्झौता उल्लङ्घन र अविश्वसनीय व्यवहारको उदाहरणका रूपमा टिप्पणी गरेको छ।
तनाव उत्कर्षमा पुगे पनि अमेरिकी अधिकारीहरूले इरानसँगको कूटनीतिक संवाद भने जारी रहने बताएका छन्। उनीहरूका अनुसार अन्तिम सहमतिको सम्भावना कायम राख्दै वार्तालाई अघि बढाउने अमेरिकी नीति यथावत् रहेको छ।
प्रकाशित मिति: २४ असार २०८३, बुधबार
प्रतिक्रिया