कुवेत र जोर्डनस्थित अमेरिकी सैन्य लक्ष्यमा इरानको आक्रमण

एजेन्सी । अमेरिकी आक्रमणको प्रतिशोधस्वरूप इरानले कुवेत र जोर्डनस्थित अमेरिकी सैन्य संरचनामाथि लक्षित आक्रमण गरेको दाबी गरेको छ। इरानी सरकारी टेलिभिजनले शनिबार सार्वजनिक गरेको सैन्य विज्ञप्तिमा उक्त जानकारी दिइएको हो।

विज्ञप्तिअनुसार कुवेतको अल–अदिरी शिविरमा रहेको गोलाबारुद भण्डारण केन्द्र, अली अल–सलेम वायुसेना आधारको मुख्यालय, हतियार भण्डारण डिपो तथा सञ्चार पूर्वाधारलाई निशाना बनाएर आक्रमण गरिएको दाबी गरिएको छ।

त्यसैगरी, जोर्डनको अल–अज्राक सैन्य आधारभित्र रहेका इन्धन भण्डारण ट्याङ्कीहरूलाई पनि लक्षित गरी मिसाइल प्रहार गरिएको इरानी सरकारी सञ्चारमाध्यमले जनाएको छ।

यता, कुवेती सेनाले आफ्नो हवाई प्रतिरक्षा प्रणाली सक्रिय पारेर शत्रुतापूर्ण लक्ष्यहरूलाई अवरोध गर्ने क्रममा विभिन्न स्थानमा विस्फोटका आवाज सुनिएको पुष्टि गरेको छ। यद्यपि, आक्रमणबाट भएको क्षति वा मानवीय हताहतीबारे कुनै आधिकारिक विवरण सार्वजनिक गरिएको छैन।

यसैबीच, बहराइनको गृह मन्त्रालयले सम्भावित हवाई आक्रमणको जोखिमलाई मध्यनजर गर्दै शनिबार देशभर चेतावनी साइरन बजाइएको जनाएको छ। बहराइनमा अमेरिकी नौसेनाको पाँचौँ बेडा तैनाथ रहेकाले सुरक्षा सतर्कता थप कडा पारिएको बताइएको छ।

इरानको दाबीबारे अमेरिकी पक्षबाट भने तत्काल कुनै औपचारिक प्रतिक्रिया सार्वजनिक भएको छैन।

प्रकाशित मिति: २ श्रावण २०८३, शनिबार