काठमाडौं । रूसको नियन्त्रणमा रहेका युक्रेनी क्षेत्र तथा रुसी सीमावर्ती गाउँमा युक्रेनले गरेको ड्रोन आक्रमणमा कम्तीमा ६ जनाको मृत्यु भएको छ। रुसी अधिकारीहरूका अनुसार गोर्लिभ्कामा चार, खेरसन क्षेत्रमा एक र बेल्गोरोद क्षेत्रको स्मोरोदिनो गाउँमा एक जनाको ज्यान गएको हो।
यता, युक्रेनी अधिकारीहरूले खार्किभस्थित एक आवासीय भवनमा रुसी ड्रोन आक्रमण हुँदा एक जनाको मृत्यु हुनुका साथै नौ जना घाइते भएको बताएका छन्। घाइतेमध्ये दुई जना बालबालिका रहेका छन् भने राजधानी किएभमा भएको ब्यालिस्टिक मिसाइल आक्रमणमा थप तीन जना घाइते भएका छन्।
दुवै पक्षले पछिल्ला दिनमा आक्रमण तीव्र बनाउँदै जाँदा नागरिक हताहती बढिरहेको छ। सन् २०२२ देखि जारी रूस–युक्रेन युद्ध अन्त्यका लागि अमेरिकाको नेतृत्वमा भएका कूटनीतिक प्रयासहरू हाल पनि ठोस निष्कर्षमा पुग्न सकेका छैनन्।
प्रकाशित मिति: १० श्रावण २०८३, आइतबार
प्रतिक्रिया