प्रहरी निरीक्षक यादवको कमजोरीका कारण भागेका थिए ६ जना थुनुवा, निलम्बनको तयारी

काठमाडौं । धनुषामा प्रहरीकै लापरबाहीले थुनावा भागेको खुलेको छ । धनुषा क्षिरेश्वरनाथ नगरपालिकास्थित इलाका प्रहरी कार्यालय सखुवा महेन्द्रनगरको हिरासत कक्षबाट आइतबार साँझ ६ जना थुनुवा भागेका थिए ।

प्रहरी स्रोतका अनुसार इलाका प्रहरी कार्यालय प्रमुख प्रहरी निरीक्षक वेतन यादवकै कमजोरीका कारण थुनुवा भागेका हुन् । थुनुवा कक्षको सीसीटीभी मनिटरिङ प्रहरी निरीक्षक यादवकै कार्यकक्षमा राखिएको थियो । तर, उनकै लापरबाहीका कारण थुनुवा भाग्न सफल भए ।

मधेस प्रदेश प्रहरी प्रमुख प्रहरी नायव महानिरीक्षक (डीआईजी) वसन्तबहादुर कुवँरले इलाका प्रहरी कार्यालय प्रमुख यादवकै कमजोर कमान्डका कारण थुनुवा भागेको भन्दै उनलाई कार्यालय प्रमुखको जिम्मेवारीबाट हटाएर प्रदेश कार्यालय तानिएको बताए ।

सात जना थुनुवा रहेकोमा ६ जना थुनुवा हिरासत कक्षको पर्खालै भागेर फरार भएका छन् । धनुषा प्रहरीका अनुसार फरार हुने थुनुवाहरूमा क्षिरेश्वरनाथ नगरपालिका–५ का लागुऔषध मुद्दाका अभियुक्त ३० वर्षीय विनोदकुमार शर्मा, सोही नगरपालिका–२ का २५ वर्षीय अमित मण्डल, सोही स्थानका २५ वर्षीय रोशन यादव छन् ।

त्यस्तै मिथिला नगरपालिका–२ बस्ने अभद्र व्यवहार मुद्दाका २५ वर्षीय हरिदीप सिंह, सोही स्थानका हातहतियार तथा खरखजाना मुद्दाका २८ वर्षीय रोशन महतो र हातहतियार तथा खरखजाना मुद्दाका ३६ वर्षीय शंकर सिंह छन् ।

एक जना भने उनीहरूले भत्काएको पर्खालको प्वालभित्र छिर्न नसक्दा भाग्न नसकेको डीआईजी कुवँरको भनाइ छ । फरार थुनुवाहरूले थुनुवा कक्षकै लागि बनाएको शौचायलको ग्रिल तोडेर सोही ग्रिलको साहाराले पर्खालमा समेत प्वाँल पारेर भाग्न सफल भएको खुलेको छ ।

डीआईजी कुवँर भन्छन्, ‘उनीहरूले केही दिन अघिदेखि नै भाग्ने योजनासहित पर्खालमा प्वाँल पार्ने काम गरेको देखिन्छ । हिजो रातिको कुरा मात्रै होइन । योजनावद्ध तरिकाले भागेका हुन् ।’

डीआईजीका कुवँरका अनुसार लागुऔषध मुद्दाका अभियुक्त विनोदकुमार शर्माको मूख्य योजनामा पर्खाल भत्काउने काम भएको खुलेको छ । उनीहरूको खोजीकार्यमा ठूलो मात्रामा प्रहरी परिचालन गरिएको छ ।

प्रकाशित मिति: १६ माघ २०७९, सोमबार