काठमाडौँ । नेकपा (एमाले) का केन्द्रीय सचिव योगेश भट्टराईले माओवादी नेतृत्वको सरकार गठन गर्न पुष्पकमल दाहाल ‘प्रचण्ड’लाई एमालेले उद्धार गरेको बताएका छन् ।
एमालेले सुरु गरेको मिसन ग्रासरूट अभियान अन्तर्गत सुर्खेतमा आयोजित एक कार्यक्रममा सचिव भट्टराईले प्रतिपक्ष मानसिकताका साथ तयार भएर बसेको एमालेले सरकार गठन गर्न प्रचण्डलाई नत्थी लगाएर नतानेको जिकिर गरे ।
उनले भने, ‘जनादेश अनुसार हामी प्रतिपक्षको मानसिकतामा थियौँ, काँग्रेसले प्रधानमन्त्री नदिएपछि कमरेड प्रचण्ड हामीसँग आउनुभयो र हामीले प्रधानमन्त्री बनाएर उद्धार गरिदियौँ ।’
एमालेलाई राष्ट्रपतिमा सघाउने माओवादीकै प्रस्ताव भएको चर्चा गर्दै सचिव भट्टराईले आफैँले गरेको प्रस्तावबाट प्रचण्ड पछि नहट्ने विश्वास व्यक्त गरे ।
उनले भने, ‘प्रचण्डसँग हामीले राष्ट्रपति मागेको होइन, उहाँ आफैँले एमालेलाई राष्ट्रपति दिने प्रस्ताव गर्नु भएको हो, अबपछि हट्न मिल्दैन । एक फरक प्रसङ्गमा सचिव भट्टराईले २०६२ सालपछि माओवादी पार्टी एमालेकरण भएको र नेपाल कम्युनिस्ट पार्टी विभाजन नभएको भए कमरेड प्रचण्ड नै जनताको बहुदलीय जनवादको असल व्याख्याता भइसक्ने उनको भनाई थियो ।
अभियानको कर्णाली संयोजकसमेत भट्टराईले ग्रासरूट अभियानका सबै कार्यक्रमहरू तल्लो तहसम्म पुग्ने र यसले पार्टीको फुलवडी चेकअप गर्ने दाबी गरे ।
प्रकाशित मिति: ८ फाल्गुन २०७९, सोमबार
प्रतिक्रिया