काठमाडौँ । नेकपा (एकीकृत समाजवादी)का अध्यक्ष माधवकुमार नेपालले नक्कली भुटानी शरणार्थी प्रकरणमा सरकारले गलत गर्न खोजे साथ दिन नसकिने स्पष्ट पारेका छन्।
शनिबार काठमाडौँमा पार्टीको उपत्यका र सम्पर्क विशेष प्रदेश कमिटीले आयोजना गरेको कार्यक्रममा उनले यस्तो बताएका हुन् । शरणार्थी प्रकरणमा अहिलेसम्म सरकारले राम्रो काम गरेकाले आफूहरूको समर्थन रहेको उनले बताए । गलत काम गर्न खोजे साथ दिनुपर्छ भन्ने बाध्यता नरहेको उनको भनाइ छ ।
उक्त प्रकरणमा सरकारले खुट्टा कमाउन नहुने भन्दै उनले जुनसुकै ओहोदामा रहेका व्यक्तिलाई पनि उन्मुक्ति दिन नहुनेमा जोड दिए ।
देशद्रोही काममा कम्युनिस्ट भनिएका व्यक्तिहरू नै संलग्न हुनु लाजमर्दो कुरा भएको उनले बताए ।
सत्तारूढ दल नेकपा (माओवादी केन्द्र) र नेपाली काँग्रेसका कतिपय व्यवहारबाट सन्तुष्ट नरहेकाले सचेत गराउनु पार्टीको कर्तव्य रहेको अध्यक्ष नेपालले उल्लेख गरे ।
“…अहिले शक्ति हासिल गरेको हुनाले, सत्तामा बसेको हुनाले काँग्रेस र माओवादीका कतिपय व्यवहारबाट हामी सन्तुष्ट छैनौँ,” उनले भने, “त्यसो भयो आलोचना पनि गर्छौँ । उनको सामु हामी नतमस्तक हुनुपर्ने कुनै पनि आवश्यकता छैन । तर, हाम्रो ध्यान आफ्नो सङ्गठन कसरी विस्तार गर्ने, बलियो कसरी बनाउने भन्ने कुरामा केन्द्रित हुनुपर्ने आवश्यकता छ ।”
प्रकाशित मिति: ३० बैशाख २०८०, शनिबार
प्रतिक्रिया