पहलगाममा २६ पर्यटकको हत्या गर्ने आतंककारीको स्केच जारी

काठमाडौं । जम्मु–कश्मिरको रमणीय पहलगाम क्षेत्रमा मंगलबार साँझ भएको आतंकी हमलामा २४ पर्यटकसहित २६ जनाको ज्यान गएको छ भने करिब त्यति नै संख्यामा मानिसहरू घाइते भएका छन्। विश्वप्रसिद्ध प्राकृतिक सुन्दरताको काखमा यस्तो घटना घट्दा सिंगो क्षेत्र शोकमा डुबेको छ।

नेपालको बुटवलबाट आमा र बहिनीसहित पहलगाम घुम्न गएका २७ वर्षीय सुदीप न्यौपाने पनि मृतकमध्ये पर्छन्। उनी भारतको मनोहर सौन्दर्य नियाल्न गएका थिए, तर जीवनकै अन्तिम यात्रा साबित भयो।

घटनामा ज्यान जोगाउन सफल भएका केही पर्यटकहरूले दिएको बयानका आधारमा, आक्रमणकारीहरूले पहिलो चरणमा सबैलाई घेराबन्दीमा पारेर पहिचान गर्दै सोधपुछ गरेका थिए र त्यसपछि एकपछि अर्को गर्दै गोली चलाएका थिए।

भारतको प्रतिबन्धित आतंकी समूह लश्कर–ए–तैयबाको सहायक संगठन द रेजिस्टेन्स फ्रन्ट (TRF) ले यो हमलाको जिम्मेवारी लिएको छ। भारतीय सुरक्षास्रोतहरूले मास्टरमाइन्डको रूपमा खालिद उर्फ सैफुल्लाह कसुरी को नाम सार्वजनिक गरेका छन्।

भारतीय सुरक्षा एजेन्सीहरूले घटनामा संलग्न आतंककारीहरूको स्केच र तस्बिर सार्वजनिक गरेका छन्। प्रारम्भिक अनुसन्धानका आधारमा तीनजनाको नाम पहिचान गरिएको छ— आसिफ फुजी, सुलेमान शाह र अबु तल्हा, जो सबै TRF का सदस्य भएको बताइएको छ।

प्रत्यक्षदर्शीहरूका अनुसार करिब ६ जना आक्रमणकारीहरू घना पाइन जंगल हुँदै आएर घाँसे मैदानमा प्रकट भएका थिए। उनीहरू कुर्ता–पाइजामा लगाएर आएका थिए र एके–४७ जस्ता घातक हतियार प्रयोग गर्दै अन्धाधुन्ध गोली चलाएका थिए।

भारतीय सञ्चारमाध्यम इन्डिया टुडे ले भारतीय गुप्तचर स्रोतलाई उद्धृत गर्दै लेखेको छ— आक्रमणकारीमध्ये केही पाकिस्तानी आतंककारीहरू थिए, जो केही दिनअघिमात्रै सीमापार घुसपैठ गरेर कश्मीर प्रवेश गरेका थिए।

हमलापछि आतंककारीहरू पुनः जंगलतर्फ फर्केर फरार भएका थिए। भारतीय सुरक्षा निकायहरूले विशेष आतंकविरोधी अभियान प्रारम्भ गरेका छन्। प्रारम्भिक फोरेन्सिक अनुसन्धानका अनुसार आतंककारीहरूले आधुनिक सैन्य हतियार तथा सञ्चार उपकरणहरू प्रयोग गरेका थिए। उनीहरू हेलमेटमा जडित क्यामेरा र बडी क्याम प्रयोग गरेर आक्रमणको दृश्यहरू कैद गरिरहेका थिए, जसले बाह्य सहयोगको स्पष्ट संकेत दिन्छ।

त्यस्तै, घटनाअघि आक्रमणकारीहरूले केही स्थानीयको सहयोगमा पहलगामको रेकी (पूर्व सर्वेक्षण) गरेका थिए र केही औषधिहरू संकलन गरेको समेत पाइएको छ। यसबाट उनीहरूको तयारी अत्यन्त संगठित र रणनीतिक रहेको देखिन्छ।

सूचना स्रोतहरूका अनुसार, मुजफ्फराबाद र कराँचीका सुरक्षित स्थानहरूमा ती आक्रमणकारीहरूको डिजिटल प्रमाणहरू भेटिएको छ, जसले घटनामा सीमापार आतंकवादीको संलग्नता पुष्टि गर्छ। साथै, बाँचेका केही व्यक्तिका अनुसार, आक्रमणकारीहरूमध्ये दुई जनाले पश्तो भाषा बोलेका थिए, जसले उनीहरूको पाकिस्तानी मूल पुष्टि गर्ने आधार दिन्छ।

भारतीय सुरक्षाबलहरू हाल ती आतंककारीहरूलाई पक्रन व्यापक सर्च अपरेशनमा छन्।

प्रकाशित मिति: १० बैशाख २०८२, बुधबार