काठमाडौं । पतञ्जली योगपीठसँग सम्बन्धित जग्गा अनियमितताको विषयमा अख्तियार दुरुपयोग अनुसन्धान आयोगले पूर्वप्रधानमन्त्री तथा नेकपा (एकीकृत समाजवादी) का अध्यक्ष माधवकुमार नेपालसँग बयान लिएको छ।
विश्वस्त स्रोतका अनुसार आयोगले केही समयअघि नेपालसँग सो प्रकरणमा बयान संकलन गरेको हो। “पतञ्जलीसँग सम्बन्धित जग्गा विवादबारे केही समयअगाडि उहाँको बयान लिइएको हो,” स्रोतले जानकारी दियो।
काभ्रेपलाञ्चोकस्थित पतञ्जली योगपीठ तथा आयुर्वेद कम्पनीको नाममा रहेको हदबन्दी छुटको जमिन किनबेच गरिएको आशंकामा अख्तियारले अनुसन्धान अघि बढाएको हो।
यसअघि केन्द्रीय अनुसन्धान ब्युरो (सीआईबी) ले समेत उक्त प्रकरणमा छानबिन थालेको थियो। तर अख्तियारले औपचारिक रूपमा अनुसन्धान थाल्नासाथ दोहोरो प्रक्रिया नहोस् भन्ने कारण देखाउँदै सीआईबीले आफ्ना अनुसन्धान कार्य स्थगित गरेको थियो।
प्रकाशित मिति: २२ बैशाख २०८२, सोमबार
प्रतिक्रिया