हेलिकप्टर दुर्घटना हुँदा ६ जनाको मृत्यु

काठमाडौं । भारतको उत्तराखण्ड राज्यको उत्तरकाशी जिल्लामा बिहीबार बिहान एक निजी कम्पनीको हेलिकप्टर दुर्घटनामा परेको छ। दुर्घटनामा छ जनाको ज्यान गएको छ भने एक जना गम्भीर घाइते भएका छन्।

दुर्घटनास्थलमा प्रहरी, प्रशासन र विपद् व्यवस्थापनको संयुक्त टोली पुगेपछि उद्धार कार्य सुरु गरिएको थियो। उत्तरकाशीको गंगानी क्षेत्र नजिकै उक्त हेलिकप्टर दुर्घटनाग्रस्त भएको हो। हेलिकप्टर एरो ट्रिंक नामक निजी कम्पनीको हो र त्यसमा सात जना सवार थिए।

विगत केही दिनदेखि उत्तराखण्डमा चारधाम यात्रा सुरु भइसकेको छ। केदारनाथ, बद्रीनाथ, गंगोत्री र यमुनोत्री दर्शनका लागि हजारौं तीर्थयात्रीहरू राज्यमा आएका छन्। ती मध्ये धेरैजसो हेलिकप्टर प्रयोग गरेर तीर्थयात्रा गरिरहेका छन् भने केहीले पैदल यात्रा पनि गरिरहेका छन्।

यसैबीच, उत्तराखण्डमा मौसम प्रतिकूल बनेको छ। भारतीय मौसम विभागले देहरादून, उत्तरकाशी, चमोली, रुद्रप्रयाग, टिहरी, पौरी, नैनीताल र चम्पावत जिल्लामा हल्कादेखि मध्यम वर्षा, मेघगर्जन र तीव्र हावाहुरीको सम्भावना रहेको चेतावनी जारी गरेको छ।

यसअघि पनि मौसमका कारण हेलिकप्टरमा समस्या देखिएको थियो। गत सोमबार, मे ५ तारिखमा, बद्रीनाथबाट देहरादून जाँदै गरेको एक हेलिकप्टरले खराब मौसमका कारण गोपेश्वरको खेल मैदानमा आपत्कालीन अवतरण गर्नु परेको थियो। मैदानमा पार्क गरिएको गाडीका कारण हेलिकप्टरले प्रहरी मैदानमा अवतरण गर्ने प्रयास गरे पनि अन्ततः खेल मैदानमा अवतरण गरिएको थियो।

यस दुर्घटनाले चारधाम यात्राका क्रममा हेलिकप्टर सुरक्षाप्रति गम्भीर प्रश्न उठाएको छ। मौसम प्रतिकूल भइरहँदा यात्रा र उडानका लागि थप सतर्कता अपनाउन विज्ञहरूले सुझाव दिएका छन्।

प्रकाशित मिति: २५ बैशाख २०८२, बिहिबार