काठमाडौं । राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रविन्द्र मिश्रमाथि थप एक आपराधिक अभियोग लगाइएको छ।
चैत १५ गते तीनकुनेमा भएको घटनापछि पक्राउ परेका मिश्रमाथि यसअघि राज्यविरुद्धको अपराध र संगठित अपराध अन्तर्गत मुद्दा दायर गरिएको थियो। यस्तै मुद्दामा थुनामा रहेका मिश्रमाथि अब आपराधिक उपद्रव सम्बन्धी अभियोग समेत थपिएको छ।
नयाँ मुद्दा दायर भएकोप्रति गम्भीर आपत्ति जनाउँदै मिश्रले आफूलाई बारम्बार “राज्यद्वारा कालो टिका” लगाइएको टिप्पणी गरेका छन्। बिहीबार जिल्ला अदालत, काठमाडौंमा म्याद थपका लागि उपस्थित गराइएका मिश्रले न्यायाधीशसमक्ष भावुक अभिव्यक्ति दिएका थिए।
उनले भने, “आज ४२ औं दिन, राज्यले फेरि मेरो निधारमा तेस्रो कालो टिका लगाएको छ। ४१ दिनसम्म राज्यविरुद्धको अपराध र संगठित अपराधको टिका बोकेर हिँडिरहेको थिएँ। अब फेरि आपराधिक उपद्रवको अर्को टिका थपिएको छ। त्यो टिका पुछ्ने अधिकार, निष्ठा यही अदालत र बेञ्चमा हुन्छ भन्ने विश्वासमा केही कुरा राख्न चाहन्छु।”
अदालतमा उनले राखेको भनाइले राजनीतिक अभियोजनप्रति संकेत गरेको देखिन्छ। मिश्रको यो अभिव्यक्तिलाई लिएर राजनीतिक वृत्तमा थप बहस हुन सक्ने अनुमान गरिएको छ।
प्रकाशित मिति: २५ बैशाख २०८२, बिहिबार
प्रतिक्रिया