एजेन्सी । भारतीय सेनाले आइतबार साँझ पत्रकार सम्मेलनको आयोजना गर्दै हालैको सैन्य अवस्थाबारे जानकारी दिएको छ। सम्मेलनमा भारतीय वायुसेनाका तर्फबाट एयर मार्शल एके भारतीले राफेल लडाकु विमानसँग सम्बन्धित प्रश्नहरूको जवाफ दिएका थिए।
पाकिस्तानी सेनाले भारतका दुई राफेल विमान खसालेको दाबी गरेको थियो। त्यसको प्रत्युत्तरमा एयर मार्शल भारतीले भने, “हामी हाल युद्धको अवस्थामा छौं र यस्तो अवस्थामा क्षति हुनु सामान्य कुरा हो। तर तपाईंहरूले सोध्नुपर्ने मुख्य प्रश्न के हो भने — के हामीले आफ्ना लक्ष्यहरू प्राप्त गरेका छौं? के हामीले आतङ्कवादी शिविरहरू ध्वस्त पार्न सफल भएका छौं? यसको उत्तर हो — हो, हामी सफल भएका छौं।”
उहाँले थपे, “यसको परिणाम अब सम्पूर्ण विश्वले हेर्न सक्छ। जहाँसम्म कुन विमान, कति संख्या वा कुन प्लेटफर्म गुमायौं भन्ने विवरणको कुरा छ, म हाल त्यसबारे टिप्पणी गर्न चाहन्न। अहिले पनि हामी रणनीतिक मोडमा छौं र यस्ता सूचनाले शत्रुलाई मात्र लाभ पुर्याउने सम्भावना हुन्छ।”
एयर मार्शल भारतीले स्पष्ट रूपमा भने, “हामी कुनै पनि जानकारीले विपक्षीलाई फाइदा पुर्याउन दिन चाहँदैनौं। म यति मात्र भन्न सक्छु — हामीले आफ्ना लक्षित उद्देश्यहरू प्राप्त गरिसकेका छौं र हाम्रा सबै पाइलटहरू सकुशल घर फर्किएका छन्।”
शनिबार साँझ भारत र पाकिस्तानबीच युद्धविराम सम्झौता भएपछि भारतीय सेनाले आइतबार पहिलोपटक सार्वजनिक रूपमा पत्रकार सम्मेलन गरेको हो। त्यही अवसरमा भारतीय सेनाका डीजीएमओ (डाइरेक्टर जेनरल अफ मिलिटरी अपरेसन्स) लेफ्टिनेन्ट जनरल राजीव घईले ‘अप्रेशन सिन्दूर’ अन्तर्गत १०० भन्दा बढी आतंककारीहरू मारिएको दाबी गरेका छन्।
प्रकाशित मिति: ३० बैशाख २०८२, मंगलबार
प्रतिक्रिया