काठमाडौं । रसुवाको केरुङ नाकाबाट स्याउ बोकेर नेपाल भित्र्याइँदै गरेको कन्टेनरमा फल्स बटम बनाई लुकाइएकाे सुन प्रहरीले बरामद गरेको छ।
जिल्ला प्रहरी कार्यालय रसुवाबाट खटिएको टोलीले आइतबार ना ४ ख ६२०१ नम्बरको ट्रक जाँच गर्ने क्रममा लुकाइराखिएको सुन फेला पारेको हो। कन्टेनर ड्राइभर बस्ने क्याबिनको माथिल्लो भागमा विशेष तरिकाले बनाइएको फल्स बटमभित्र सुन लुकाइएको थियो।
रसुवा प्रहरी प्रमुख डीएसपी हेमबहादुर शाहीले सुन बरामद भएको पुष्टि गरेका छन्। यद्यपि, नेपाल प्रहरीका एक उच्च स्रोतका अनुसार उक्त ट्रकबाट ७ किलो ६५३ ग्राम सुन बरामद गरिएको हो। सुनसँगै संलग्न रहेको आशंकामा एक जना व्यक्तिलाई पक्राउ गरिएको बताइएको छ, तर अनुसन्धानको गोपनीयताका कारण उनको नाम हालसम्म सार्वजनिक गरिएको छैन।
“गोप्य सूचनाको आधारमा कन्टेनर जाँच गर्दा फल्स बटमभित्र लुकाइएको सुन फेला परेको हो,” स्रोतले जानकारी दियो। बरामद गरिएका सुनका बिस्कुटहरूको थप परीक्षण तथा परीक्षणपछि सुनको शुद्धता र मुल्याङ्कन गरिने जनाइएको छ।
हालैका दिनहरूमा त्रिभुवन अन्तर्राष्ट्रिय विमानस्थल हुँदै हुने सुन तस्करीमा निगरानी कडा बनाइएपछि तस्करहरूले वैकल्पिक मार्गका रूपमा उत्तरी नाका प्रयोग गर्न थालेका छन्। विमानस्थलमार्फत सामान्यतः वैदेशिक रोजगारीमा गएका व्यक्तिहरूलाई प्रयोग गरी सानो मात्रामा सुन भित्र्याइने गरिन्छ भने उत्तरी नाकाबाट भने ठूलो परिमाणमा—किलोकिलोमा सुन तस्करी गरिँदै आएको छ।
नेपाल हुँदै तस्करी हुने अधिकांश सुन भारततर्फ पठाइने गरेको अनुसन्धानबाट खुलेको छ। यस्ता घटनाले सीमामा कडाइ आवश्यक भएको र सुन तस्करी रोक्न थप रणनीतिक निगरानी प्रणाली आवश्यक रहेको देखिएको छ।
प्रकाशित मिति: ४ जेष्ठ २०८२, आइतबार
प्रतिक्रिया