काठमाडौं । प्रतिनिधि सभा अवरुद्ध भइरहेका बेला प्रमुख प्रतिपक्षी दल नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले विपक्षी दलका नेताहरूसँग छलफल गरेका छन्।
भिजिट भिसा प्रकरणमा गृहमन्त्री रमेश लेखकको संलग्नता भएको भन्दै उनीहरूको राजीनाको मागसहित सदन अवरुद्ध गर्दै आएका विपक्षी दलहरू आगामी रणनीति तय गर्न छलफलमा जुटेका हुन्। माओवादी केन्द्रका प्रमुख सचेतक हितराज पाण्डेका अनुसार, छलफल जारी छ र विपक्षी दलहरू आफ्ना मागबाट पछि नहट्ने अडानमा छन्।
प्रतिनिधि सभाको बैठक बिहान ११ बजेका लागि बोलाइएको भए पनि राजनीतिक गतिरोधका कारण अहिलेसम्म सुरु हुन सकेको छैन। चलिरहेको छलफलमा रास्वपा, नेकपा (एकीकृत समाजवादी) लगायतका विपक्षी दलहरू सहभागी छन्, तर राप्रपा भने उपस्थित छैन।
त्यसैगरी प्रधानमन्त्री केपी शर्मा ओली, नेपाली कांग्रेसका सभापति शेरबहादुर देउवा र गृहमन्त्री लेखकसमेत सत्ता पक्षका शीर्ष नेताहरू आन्तरिक बैठकमा सहभागी छन्। सरकार पक्षले गृहमन्त्रीको राजीनामा आवश्यक नरहेको बताउँदै उनलाई संसद्मा आफ्नो धारणा राख्ने अवसर दिने तयारी गरेको छ। तर विपक्षी दलहरू भने गृहमन्त्रीले पद त्याग नगरेसम्म सदन सञ्चालन हुन नदिने अडानमा कायम छन्।
यसरी, भिजिट भिसा प्रकरणले सिर्जना गरेको राजनीतिक विवादले संसद अवरुद्ध गरिरहेको छ र समाधानका लागि चलिरहेका वार्ता अहिलेसम्म निष्कर्षमा पुग्न सकेका छैनन्।
प्रकाशित मिति: १४ जेष्ठ २०८२, बुधबार
प्रतिक्रिया