काठमाडौं । नेकपा (एकीकृत समाजवादी)का अध्यक्ष माधवकुमार नेपालले गणतन्त्रको विकल्प केवल अझ परिष्कृत र सुदृढ गणतन्त्र मात्र हुन सक्ने बताएका छन्। गणतन्त्र दिवसको अवसरमा पार्टी कार्यालयमा आयोजित कार्यक्रममा बोल्दै उनले वंशीय शासन प्रणालीको घोर विरोध गर्दै देशमा पुनः राजतन्त्र फर्काउने प्रयासप्रति कडा आपत्ति जनाए।
“गणतन्त्रको विकल्प राजतन्त्र होइन, उन्नत गणतन्त्र हो,” अध्यक्ष नेपालले भने, “वंशको आधारमा शासन व्यवस्था हुनु अनुचित हो। बाबु भएन भने छोरा, छोरा भएन भने नातिलाई जिम्मा दिने सोचले हामीले देश चलाउनु हुँदैन।”
पूर्वराजा ज्ञानेन्द्र शाहलाई लक्षित गर्दै नेपालले मुलुकप्रति चिन्ता भएको दाबी गर्ने हो भने चुनावी प्रतिस्पर्धामा सहभागी भई प्रधानमन्त्री बन्न चुनौती दिए। “यदि उहाँलाई साँच्चिकै देशको चिन्ता छ भने, चुनाव लडेर जनताको मत र विश्वास जितेर प्रधानमन्त्री बन्नुहोस्,” उनले भने।
उनले इतिहासलाई पछाडि धकेल्ने प्रयास सफल नहुने स्पष्ट पार्दै लोकतान्त्रिक मूल्य र जनताको अधिकारको रक्षा गर्न आफूहरु दृढ रहेको बताए।
अध्यक्ष नेपालले हालका परिस्थितिमा अन्य पार्टीहरूसँग एकता गर्ने सम्भावना नरहेको स्पष्ट पारे। उनले कम्युनिस्ट आन्दोलनलाई बलियो बनाउन पार्टी निर्माणको अभियानमा लाग्न कार्यकर्ताहरूलाई निर्देशन दिए।
उनको भनाइ अनुसार, “कम्युनिस्ट पार्टीको विकल्प अरू कुनै पार्टी हुन सक्दैन। हामी अझ संगठित भएर अगाडि बढ्नुपर्छ।”
यसरी गणतन्त्रको मर्ममाथि बल दिँदै उनले पूर्वराजालाई प्रतिस्पर्धात्मक राजनीतिमा आउने आँट गर्न सार्वजनिकरूपमा चुनौती दिएका छन्।
प्रकाशित मिति: १५ जेष्ठ २०८२, बिहिबार
प्रतिक्रिया