काठमाडौं । सरकारले समस्याग्रस्त सहकारी संस्थामा फसेको सर्वसाधारणको बचत रकम फिर्ता गर्न ‘चक्रीय कोष’ स्थापनाको घोषणा गरेको छ। आगामी आर्थिक वर्ष २०८२/८३ को बजेट सार्वजनिक गर्दै अर्थमन्त्री विष्णुप्रसाद पौडेलले यो व्यवस्था अघि सारेका हुन्।
उनका अनुसार, सहकारी संस्थामा रहेको पाँच लाख रुपैयाँसम्मको बचत निक्षेप तथा कर्जा ‘सहकारी कर्जा तथा बचत सुरक्षण कोष’ मार्फत सुरक्षित गरिनेछ। साथै, बचतकर्ताले फिर्ता पाउन बाँकी रकम सहकारी सञ्चालक वा अपचलनकर्ताबाट असुल गर्न उनीहरूको सम्पत्ति लिलामी गरी चक्रीय कोषमार्फत भुक्तानी गरिनेछ।
अर्थमन्त्री पौडेलले सहकारी सञ्चालक, पदाधिकारी तथा कर्जा अपचलनमा संलग्न व्यक्तिहरूको सम्पत्ति र राहदानीसमेत रोक्का गरिने उल्लेख गरेका छन्। यसका लागि प्रारम्भिक चरणमा चक्रीय कोषमा बीउ पूँजीको व्यवस्था गरिएको छ।
सरकारको यो कदमले सहकारी पीडितको विश्वास पुनःस्थापना गर्न सहयोग पुग्ने अपेक्षा गरिएको छ।
प्रकाशित मिति: १५ जेष्ठ २०८२, बिहिबार
प्रतिक्रिया