काठमाडौं । इजरायलले आफ्नो पछिल्लो आक्रमणमा इरानका नवनियुक्त ‘युद्धकालीन’ प्रमुख सेनानी अली शादमानीलाई मारेको दाबी गरेको छ। इजरायली रक्षा बल (आईडीएफ) ले रातभरको कारबाहीमा उनी मारिएको बताएको छ।
‘सटीक गुप्तचर’ र ‘मंगलबार रातिको अचानक प्राप्त अवसर’ पछि इजरायली वायु सेना (आईएएफ) ले तेहरानको केन्द्रमा रहेको सैन्य कमान्ड सेन्टरमा आक्रमण गरेको थियो। ‘यो आक्रमणमा अली शादमानी मारिए,’ आईडीएफको विज्ञप्तिमा उल्लेख छ।
इरानले शादमानीको मृत्युबारे इजरायलको दाबीमा अहिलेसम्म कुनै प्रतिक्रिया दिएको छैन। शादमानीले गत शुक्रबार मात्र खातम अल-अन्बिया केन्द्रीय मुख्यालयको नेतृत्व सम्हालेका थिए। यो संस्थाले इरानको नियमित सेना र इस्लामिक रिभोल्युसनरी गार्ड कोर (आईआरजीसी) बीच समन्वय गर्छ।
उनको नियुक्ति अघिल्लो इजरायली आक्रमणमा मारिएका उनका पूर्ववर्ती लेफ्टिनेन्ट जनरल घोलाम अली रशिदको स्थानमा भएको थियो। उक्त आक्रमणमा अन्य वरिष्ठ सैन्य कमान्डरहरू पनि मारिएका थिए।
आईडीएफको विज्ञप्तिमा भनिएको छ, ‘आफ्नो विभिन्न भूमिकामा शादमानीले इजरायलविरुद्ध इरानका सैन्य योजनाहरूलाई प्रत्यक्ष प्रभाव पारेका थिए।’ यो आक्रमणले इरान र इजरायलबीचको तनावलाई थप चर्काएको छ। एजेन्सी
प्रकाशित मिति: ३ असार २०८२, मंगलबार
प्रतिक्रिया