काठमाडौं । एसीसी यू-१६ इस्ट जोन कप अन्तरगत पहिलो खेलमा नेपालका ओपनर सुर्यान्सु कोइराला घाइते भएका छन् । उनी ब्याटिङ गर्ने क्रममा मैदानमै ढलेका थिए ।
सिंगापुरले पहिलो ब्याटिङ गर्दै नेपाललाई १३६ रनको सामान्य लक्ष्य दिएको थियो । जवाफी ब्याटिङमा नेपालका सुर्यान्सु कोइराला र प्रसिद्ध जैसीले नेपालको इनिङ सुरुवात गरे । तर सुर्यान्सु रिटायर्ड हर्ट भएपछि नेपाललाई झट्का लागेको छ ।
दोस्रो ओभरको खेल चल्दा सुर्यान्सु घाइते भएका हुन् । १.२ ओभरमा बलरले नोबल फ्याकेका थिए । अघिल्लो ओभरमा लगातार दुई चौका हानेका सुर्यान्सुले ‘नो बल’ लाई छक्काका लागि लङ अनमा उडाउने प्रयास गरे । कनेक्ट पनि भयो, तर फिल्डरले बाउन्ड्री नजिक बल रोके । यता सुर्यान्सु भने सट हान्नासाथ मैदानमा ढल्न पुगेका थिए । उनको सम्भवतः सट हान्दा उनको हात सड्किएको थियो ।
मेडिकल टिम आएर सुर्यान्सुलाई प्राथमिक उपचार गरे पनि उनी खेल्न सकेनन् । उनलाई मैदानबाहिर लगिएको छ । यो समाचार बनाउँदासम्म नेपालले ७ ओभरमा विनाविकेट क्षति ३६ रन बनाएर खेलिरहेको छ । सुर्यान्सु फेरि मैदानमा फर्किन सक्छन् वा सक्दैनन् भन्नबारे केही बताइएको छैन ।
प्रकाशित मिति: ८ असार २०८२, आइतबार
प्रतिक्रिया