काठमाडौं । उद्योग, वाणिज्य तथा आपूर्तिमन्त्री दामोदर भण्डारीले दैलेख जिल्लाको मिथेन ग्यास उत्खनन् कार्य एक वर्षभित्र सुरु गर्ने गरी मन्त्रालयले योजना बनाएको बताएका छन्।
सोमबारको प्रतिनिधि सभाको बैठकमा विनियोजित बजेटमाथिको छलफलका क्रममा सांसदहरुले उठाएका प्रश्नको जवाफ दिने क्रममा उनले यस्तो बताएका हुन्।
उनले दैलेख जिल्लाको जलजलेमा ठूलो परिणाममा तेल ग्यास अन्वेषणमा धेरैले चासो राखेको बताए। यो आयोजना सञ्चालन गर्दा चिनियाँ जियोलोजिक सर्वे कम्पनीको तर्फबाट प्रारम्भिक रिपोर्ट आएको र प्रारम्भिक रिपोर्टले देशलाई नै खुशी बनाएको बताए।
एक वर्षभित्र यसलाई उत्पादन परीक्षण कामलाई अघि बढाउने गरी मन्त्रालयले आवश्यक योजना बनाएको मन्त्री भण्डारीको दाबी छ। नेपालको समृद्धिमा खानी, खनिजलगायतका क्षेत्रको विकास गर्नुपर्ने र त्यसको उत्खनन् गर्नुपर्ने विषयलाई मन्त्रालयले प्राथमिकतामा राखेको बताए।
प्रकाशित मिति: ९ असार २०८२, सोमबार
प्रतिक्रिया