काठमाडौँ । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले भिजिट भिसा प्रकरणमा सरकारले गठन गरेको छानबिन समिति अस्वीकार्य भएको टिप्पणी गरेका छन्।
मंगलबार सामाजिक सञ्जालमार्फत प्रतिक्रिया जनाउँदै लिङ्देनले उक्त समिति पूर्वाग्रही र निष्पक्षताविहीन भएको दाबी गरे। छानबिनको दायरामा परेका व्यक्तिका मातहतमा कार्यरत कर्मचारीहरूलाई नै समितिमा राखिएको भन्दै उनले त्यसप्रति आपत्ति जनाएका हुन्।
उनले लेखेका छन्, “जसका गतिविधिबारे छानबिन गर्नुपर्ने हो, उसैका अधीनस्थ कर्मचारीलाई समितिमा समावेश गरिएको छ। यस्तो समितिले निष्पक्ष ढंगले छानबिन गर्न सक्दैन। त्यसैले यो समिति अमान्य छ।”
राप्रपाले यसअघि पनि भिजिट भिसा प्रकरणमा निष्पक्ष र प्रभावकारी छानबिनको माग गर्दै आएको थियो। लिङ्देनको यो धारणा उक्त मागलाई अझै बलियो बनाउने संकेतको रूपमा हेरिएको छ।
प्रकाशित मिति: १० असार २०८२, मंगलबार
प्रतिक्रिया