काठमाडौं । नेपाल प्रीमियर लिग (एनपीएल) को दोस्रो सिजनका लागि लुम्बिनी लायन्सले मार्की खेलाडी रोहित पौडेलसहित ६ खेलाडीलाई रिटेन गरेको छ।
रिटेन गरिएको खेलाडीमा कप्तान रोहित पौडेलसँगै विवेक यादव,सन्दीप जोरा,दिनेश अधिकारी,तिलकराज भण्डारी र अभिषेक गौतम छन्।
त्यस्तै सूर्य तामाङ,अर्जुन साउद,दुर्गेश गुप्ता,आशुतोष घिरैया,विकास अग्री र आरिफ खानलाई टिमबाट रिलिज गरिएको क्लबले जानकारी दिएको छ।
लुम्बिनी लायन्सका अध्यक्ष ईश्वर जीसीले विज्ञप्ति जारी गर्दै टिमका सम्पूर्ण खेलाडीप्रति धन्यवाद व्यक्त गरेका छन्। उनले एपीएलको यात्रा अविस्मरणीय बनाउने सबै खेलाडीको योगदान अमूल्य रहेको उल्लेख गर्दै, “तपाईंहरू सधैं लुम्बिनी परिवारका हिस्सा रहनुहुन्छ,” भनेका छन्।
उनले ‘गर्वको गर्जन’को नारासहित अगाडि बढिरहेको लुम्बिनी लायन्सले नयाँ सिजनमा थप ऊर्जा र आत्मविश्वासका साथ मैदानमा उत्रिने बताए। साथै उनले आगामी सिजनमा समर्थकको निरन्तर साथ र माया पनि अपेक्षा गरेका छन्।
प्रकाशित मिति: ११ असार २०८२, बुधबार
प्रतिक्रिया