फ्रान्सको समुद्र किनार वा सार्वजनिक पार्कमा धूमपान गर्न रोक लगाइएको छ ।
बालबालिकालाई निष्क्रिय धूमपानको खतराबाट जोगाउने उद्देश्यले आइतबारदेखि नयाँ नियमअन्तर्गत यो कानुन लागु हुने छ र उल्लङ्घन गर्ने जोकोहीलाई कानुनी कारबाही हुने छ ।
शनिबार सरकारी राजपत्रमा प्रकाशित भएको एक दिनपछि लागु हुन लागेको प्रतिबन्धका कारण पुस्तकालय, स्विमिङ पुल र विद्यालय आसपासका बस स्टप र क्षेत्रहरू पनि प्रभावित हुने छन् ।
समुन्द्री किनारमा बालबालिकालाई धूमपानको प्रभावबाट जोगाउन फ्रान्समा विद्यालय बिदा सुरु हुनुभन्दा एक साताअघि नै यो नियम लागु गरिएको छ ।
प्रतिबन्धको निर्णयबाट खुसी बनेका तम्बाकू विरोधी अभियन्ताहरूले सरकारको प्रतिबन्धले बार र रेस्टुरेन्टका छतहरूलाई नसमेटेकोमा भने चिन्ता व्यक्त गरेका छन् । विद्युतीय चुरोटमा पनि प्रतिबन्ध नलाग्दा उनीहरू दुःखी छन् ।
स्वास्थ्य मन्त्रालयले यसअघि नै घोषणा गरेपछि सुरुमा यो नियम मङ्गलबारदेखि लागु हुने अपेक्षा गरिएको थियो तर राजपत्रमा प्रकाशित भएपछि कार्यान्वयनमा लैजान यसलाई आइतबारका लागि सारिएको थियो ।
नयाँ नियमअनुसार विद्यालय, स्विमिङ पुल, पुस्तकालय र अन्य स्थानको १० मिटरको परिधिभित्र धूमपान गर्न पाइने छैन ।
स्वास्थ्य मन्त्रालयले आगामी दिनमा यी क्षेत्रमा धूमपानका लागि न्यूनतम दूरी घोषणा गर्नुका साथै त्यस्ता क्षेत्र तोक्न प्रयोग गरिएको सङ्केत समेत सार्वजनिक गर्ने जनाएको छ ।
प्रतिबन्धको उल्लङ्घन गर्नेलाई १३५ युरो (१६० अमेरिकी डलर) देखि अधिकतम ७०० युरोसम्म जरिवाना हुन सक्छ । यद्यपि स्वास्थ्य मन्त्रालयले नयाँ नियमहरू व्याख्या गरिएकाले प्रारम्भिक थप समयको अपेक्षा गरेको छ ।
प्रकाशित मिति: १६ असार २०८२, सोमबार
प्रतिक्रिया