काठमाडौँ । नेपाल राष्ट्र बैंकले बैंकिङ प्रणालीबाट ५० अर्ब रुपैयाँ तरलता खिच्ने भएको छ । बैंकहरुले लगानी गर्न नसकेको करिब पौने सात खर्ब रुपैयाँ राष्ट्र बैंकले तानिसकेको छ । आइतबार थप ५० अर्ब रुपैयाँ तरलता राष्ट्र बैंकले बैंकिङ प्रणालीबाट खिच्ने भएको हो ।
निक्षेप सङ्कलन उपकरण बोलकबोल मार्फत ४२ दिनको लागि राष्ट्र बैंकले बैंकिङ प्रणालीबाट तरलता प्रशोधन गर्न लागेको छ । साँवा ब्याज भुक्तानी आगामी भदौ १५ गते बुझाउने राष्ट्र बैंकले जनाएको छ । निक्षेप सङ्कलन उपकरणको ब्याजदर बोलकबोलबाट तय हुनेछ ।
नयाँ मौद्रिक नीति कार्यान्वयनमा आएपछि केन्द्रीय बैंकले पहिलो पटक निक्षेप सङ्कलन उपकरण बोलकबोल गर्न लागेको हो ।
बोल गर्न सकिने रकम न्यूनतम १० करोड रुपैयाँ र अधिकतम ५ करोड रुपैयाँले भाग गर्दा निःशेष भाग जाने गरी कुल आह्वान रकमसम्म हुनेछ ।
सोमबारका लागि जारी बोलकबोलमा राष्ट्र बैंकबाट इजाजतप्राप्त ‘क’, ‘ख’ र ‘ग’ वर्गका बैंक तथा वित्तीय संस्था मात्र सहभागी हुन पाउनेछन् ।
प्रकाशित मिति: ४ श्रावण २०८२, आइतबार
प्रतिक्रिया