काठमाडौं । भारतको केरलाबाट मुम्बई आउँदै गरेको एयर इन्डियाको एक विमान सोमबार बिहान अवतरण गर्ने क्रममा रनवेबाट चिप्लिएको छ। लगातारको भारी वर्षाका कारण विमान अवतरणमा समस्या आएको बताइएको छ। यद्यपि दुर्घटना ठूलो हुन नपाई सबै यात्रु सकुशल रहेको पुष्टि भएको छ।
एआई २७४४ नम्बरको उक्त विमान बिहान करिब ९:३० बजे मुम्बईको छत्रपति शिवाजी महाराज अन्तर्राष्ट्रिय विमानस्थलमा अवतरण गर्ने क्रममा रनवेबाट चिप्लिएर बाहिर पुगेको थियो। विमानस्थल प्रशासनका अनुसार विमान त्यसपछि सुरक्षित रूपमा गेटसम्म पुगी रोकिएको हो। जहाजमा सवार यात्रु तथा चालक दलका सदस्यहरू कसैलाई पनि कुनै चोटपटक लागेको छैन।
एयर इन्डियाले एक विज्ञप्ति जारी गर्दै उक्त घटना भएको पुष्टि गर्दै सबै यात्रुहरू सकुशल रहेको जानकारी दिएको छ। उता, भारतीय सञ्चारमाध्यमहरूले विमान अवतरणका क्रममा तीन वटा टायर पड्किएको र इन्जिनमा समेत क्षति पुगेको हुन सक्ने आशंका व्यक्त गरेका छन्। हाल विमानलाई ग्राउन्ड गरेर प्राविधिक परीक्षण थालिएको छ।
विमानस्थलका अनुसार घटना भएको केही मिनेटमै आपतकालीन उद्धार टोली परिचालन गरिएको थियो। रनवे ०९/२७ मा सामान्य क्षति पुगेको र हाल सहायक रनवे १४/३२ प्रयोगमा ल्याइएको छ ताकि विमान आवागमनमा असर नपरोस्।
स्रोतका अनुसार विमान चिप्लिएर हिलो क्षेत्रमा पुगे पनि गम्भीर क्षति नहुने गरी स्थिति नियन्त्रणमा लिइएको थियो। घटनाको विस्तृत अनुसन्धान गर्न भारतको नागरिक उड्डयन महानिर्देशनालय (DGCA) का अधिकारीहरू स्थलमा पुगेका छन्।
सम्बन्धित अधिकारीहरूले यात्रु सुरक्षालाई सर्वोच्च प्राथमिकतामा राखेर आवश्यक कदम चालिएको जानकारी दिएका छन्।
प्रकाशित मिति: ५ श्रावण २०८२, सोमबार
प्रतिक्रिया