काठमाडौं । नेकपा (एमाले) का अध्यक्ष एवं प्रधानमन्त्री केपी शर्मा ओलीले पार्टी नेताहरूलाई पूर्वराष्ट्रपति विद्यादेवी भण्डारीको प्रवक्ताको भूमिकामा नउत्रन कडा चेतावनी दिएका छन्।
सोमबार च्यासलमा बसेको एमाले केन्द्रीय समिति बैठकलाई सम्बोधन गर्दै ओलीले पूर्वराष्ट्रपति भण्डारीसँग आइतबार पार्टी कार्यालयमै भएको भेटवार्ताबारे प्रस्ट पारेका हुन्। उनले भण्डारीसँगको भेटमा राष्ट्रिय राजनीति, राष्ट्रपतिको गरिमा र गणतन्त्रका संवेदनशील पक्षबारे विचार राखिएको र कुनै अनावश्यक विवाद सिर्जना नगर्न आग्रह गरिएको जानकारी दिए।
“मैले विद्याजीलाई सुझाव मात्र दिएको हुँ, उनले आफ्नो धारणा पछि दिने बताउनुभएको छ। तर केही नेताहरू मिडियामा प्रवक्ताजस्तै व्यवहार गर्दै छन्, जुन अनुशासन विपरीत हो,” ओलीले भने, “अब यस्ता गतिविधि दोहोरिएमा कारबाही हुनेछ।”
अध्यक्ष ओलीले भण्डारीसँगको भेटवार्ता पूर्वराष्ट्रपतिबाटै प्रस्ताव आएको स्पष्ट पार्दै भेटका क्रममा पोलिटब्युरोको निर्णयबारे समेत जानकारी गराइएको बताए।
उनले भण्डारीले पार्टी कार्यालय हेरेको छैन भन्ने कुरा सामान्य भएको उल्लेख गर्दै त्यसलाई अनावश्यक रुपमा प्रचार गरिएकोप्रति असन्तुष्टि जनाए। “पूर्वराष्ट्रपति र पार्टी अध्यक्षबीच भेट हुनु स्वाभाविक हो। त्यसलाई अतिरञ्जित गर्न जरुरी छैन,” उनले भने।
ओलीले केही असन्तुष्ट समूहहरू, जसले अघिल्लो चुनावमा उम्मेदवारी दिएर हार व्यहोरेका थिए, अहिले पनि भ्रम फैलाउने काम गरिरहेको आरोप लगाए। “पार्टीभित्र अनुशासन कायम राख्न आवश्यक छ। अब यस्ता गतिविधि नियन्त्रण नगरे अनुशासनको कठोर कार्यान्वयन हुनेछ,” ओलीको भनाइ थियो।
साथै, अध्यक्ष ओलीले पार्टी सदस्यता नवीकरणको विषय अहम् नभए पनि हालसम्म त्यसबारे कुनै निर्णय नभएको र पार्टीको औपचारिक अनुमति बिना सदस्यता नवीकरण मान्य नहुने पनि स्पष्ट गरे।
ओलीले आइतबारको भेटवार्तालाई ‘कट अफ’ बैठकको रूपमा लिन आग्रह गर्दै आगामी दिनमा यस विषयलाई अनावश्यक विवादमा तान्न नहुने धारणा व्यक्त गरे।
प्रकाशित मिति: ५ श्रावण २०८२, सोमबार
प्रतिक्रिया